Messi leh Mbappe telna PSG an tla

Paris Saint-Germain chu French Cup last 16 aṭangin Nice hneh loin an tla, team phanihte goal awm loa an inhnehtawk hnuah penalty shotout hmangin chak zawk zawn a ngai; Nice lamin 6-5 in hnehna an chang.

PSG hian French Cup vawi 15 an chawi tawhna belh chhah ngei an tum, mahse a zawna vawi riat final luh an beiseina chu a thamral. An inkhelhna hi Parc des Princes a nih avangin Paris club tan mualphona a thuah hnih hle.

PSG an tla
Mauricio Pochettino-a'n chak ngei a duh a, kumina a vawi khat nan Lionel Messi chuan bul ṭanin minute 90 a khel. Hliam vangin Neymar chu squad-ah telh a la ni lo, forward Kylian Mbappe chu bench lamah dah a ni thung.

Marco Verratti, Mauro Icardi leh Julian Draxler ten bul an ṭan vek bawk avangin PSG hi a ṭha tawk viau. Chutih rualin Nice hi Ligue 1 champion beisei ngam leh PSG elpui ber an ni miau a, player nei pan deuh mah se an zam bik lem lo.

PSG hian ball chang tamin hun ṭha insiam nual mah se goal hmaah an hriam tawk lo, minute 64-naah Icardi la chhuakin Mbappe meuh pawh dah luh ni mah se awmzia a nei phak tawh lo, minute 90 chhungin goal lut lo mah se extra time khel loin penalty an chhuih zui.

Nice tan Andy Delort-a'n a hlah a, mualneitu la tan Leandro Paredes leh Xavi Simons ten an hlah thung - Messi, Mbappe, Draxler, Verratti leh Juan Bernant te khungin PSG a chhanhim zo lo a ni.

Poch a lawm lo
PSG tan nomawi chawi theih zawng zawng chawi a pawimawh. Season hmasa Ligue 1 lama an chet ṭhat tawk loh avangin coach Thomas Tuchel pawhin a tuar tawh, coach thar Poch hnuaiah an champion phak lo a nih kha - kuminah an nomawi kawl lai pakhat chu an hloh leh ta phawt.

Poch chuan, "Kan lawm lo takzet, penalty-a chak loh hi chu a na. Inkhelh chhung zawng khan team ṭha zawk an ni a, mahse tlangna tur khawpin thil kan ti thei si lo, penalty hi chu a nihna takah chuan ṭhum vawr ang deuh a nihna chen a awm.

"Keimah chauh ni loin player pawhin na an ti, tunah chuan match hmabak atan rilru kan seng nghal ang," a ti. Pathianni zanah champion lai Lille an lenchilh dawn a, chetsual chhunzawm a remchang lo ang.

Argentina manager Pochet-tino chuangah mawhphurhna a sang zual tawh dawn. Ligue 1 champion chu an nih ngei hmel, mahse Champions League lama an hlawhtling tel lo a nih chuan season thara a hna ngai thawh chhunzawm a harsa mai thei.