Barty a kal fal zel

Hmeichhe tennis thuneitu sang Women's Tennis Association (WTA) chuan ranking thar a ti chhuak a, world number 1 ni lai Ashleigh Barty chuan point 8331 hmuin a chuang berah a awm chhunzawm.

Kum 25 mi Barty hian amah hnaih bertu Aryna Sabalenka aiin point 2600 chuangin a nei hnem. Australian Open khelh zawh takah khan Barty hi a champion laiin Sabalenka erawh fourth round paltlang zo loin a tla.

Australian Open final-a chak lo zawk Danielle Collins a zuang sang hle. American nula hian player 20 ngawt kal pelin 10-na a ni phak a, tennis a khelh hun chhunga a tawn sang ber ṭum a ni.

Ranking sang zingah Garbine Muguruza chu che nasa zinga mi a ni, a chet dan erawh a lawmawm lo. Spanish nula hi player pali ngawtin an tlan pelh avangin pasarihnaah a tlahniam.