Liverpool-in Carvalho lei hman lo

Premier League club Liverpool-in transfer tawp niah an beisei leh duh an thlentir thei lo a, Fulham rawlthar duhawm Fabio Carvalho chu lakluh tum mah se hun tiam chhungin an ziak lut hman lo.

Kum 19 mi forward hi Reds chuan pound maktaduai riata lalut turin Fulham hi inremna an neihpui a, medical test pawh neih vek tawh in, Anfield-a kum nga cham turin inremna an neihpui.

Mahse, Fulham lamin loan-a kawl chhunzawm an duh a, hetah pawh hian inrem mah se Championship club thil phut hian a nih tur ang aiin inbiakna hi a tirei ta niin a lang.

Premier League-ah chuan transfer theih hun tawp hnu pawha transfer a thlen theih nan 'deal sheets' an tih chu an hmang ṭhin a, he deal sheet hian transfer-a inrem vek a nih thu leh, lehkha pawimawh chu a hnua thehluh a nih tur thu a tarlang ṭhin.

Mahse, EFL lamah deal sheet hman ve a nih loh avangin Liverpool chuan hei hi an chhawr ṭangkai thei lo a, an player duh hi an lalut thei ta rih lo a ni.

Fulham tan match 23-a goal kua khung thei forward hian nipui transfer-ah a contract a hmang zo dawn a, Jurgen Klopp-a hnuaia khelh a châk avangin Reds hian an dawr nawn ngei a rinawm.

Chutihrual chuan kum 24 hnuai lam player contract hmang zo tur a nih avangin Reds hian zângnadawmna an pek a ngai thung ang. Hetihlai hian Reds hian Nat Phillips chu Bournemouth-ah loan-in an kaltir a, Fulham hian Belgian defender Denis Odoi chu an ram club Club Brugge-ah an kaltir bawk.