Hyderabad-in NorthEast United an sawp

Thawhṭanni zan Indian Super League inkhelah Bartholomew Ogbeche chuan goal hnih khungin ISL-a goal khung hnem ber record thar a siam a, Hyderabad FC chu NorthEast United lakah 5-0 in hnehna a chanpui.

Hyderabad tan hian Akash Mishra, Nikhil Poojary leh Edu Garcia ten goal khat ṭheuh an khung bawk a, Highlander lamin a chhanletna tur an neih loh avangin chiang takin Hyderabad an chak.

Northeast United tan Marco Sahanek freekick aṭanga ball kal chu Zakaria Diallo chuan uiawm takin a khung lo a; 3-0 a nih hnuah yard 30 vel aṭanga Pragyan Gogoi-a bar pet per, let lehlam chu Suhair Vadakkepeedika chuan Highlander tan a khungah inngai mah se offside vangin pawmsak a ni lo bawk - NorthEast tan Joe Zoherliana chu minute 46-naah luhtir a ni a, Mizo player dang inlan an awm lo.

Highlander aṭanga ISL-a a career ṭantu Bartholomew Ogbeche-a'n ISL-ah match 70 aṭangin goal 49 a khung a, goal 48 ve ve khungtu Sunil Chhetri leh Ferran Corominas lehpelin ISL-a goal khung hnem ber record a chelh mek.

Nigeria tan vawi 11 inlana goal thum khung thei striker hian tun season ISL-ah ringawt pawh match 13 khelin goal 14 a khung tling der tawh a, a record hi a namai lo hle.

Hyderabad-in hnehna an chan avangin table chung ber an luah chhunzawm zel a, NorthEast United erawh 10-naah an awm chhunzawm - zanina Chennaiyin hmachhawn tur East Bengal an chak chuan Khalid Jamil-a naute hian table-ah 11-na dinhmun an luah zui ang!