Subhash Bhowmick an vui liam

Nimin khan Indian football-a coach langsar ber zinga mi Subhash Bhowmick chu Kolkata-ah an vuiliam a, a vuina hunah hian Indian football-a mi challang tak tak telin Mizo zinga professional footballer hmasa ber S. Malsawmtluanga pawh a tel.

Bhowmick hi October 2, 1950 khan Malda, West Bengal-ah a piang a, player leh coach angin sulhnu ṭha tak a nei. January 22, 2022 khan kum 71 mi niin zun thlum natna leh kal ṭha lo vangin a thi.

Kolkata-a 'Big Two' tih hming an vuah East Bengal leh Mohun Bagan tan Bhowmick hi a khel kawp a, inelna hrang hrang Calcutta Football League, IFA Shied, Rovers Cup, DCM Trophy, Bordoloi Trophy, Federation Cup leh inelna hrang hrangah nomawi a chawi.

Bhowmick hian India tan match 24 khelin goal kua a khung a, kum 1970 khan Asian Games-ah bronze medal a lakpui a, Santosh Trophy-ah Bengal vawi li a champion pui bawk.

Coach hna a chelh hnuah Kolkata club ṭha pathum East Bengal, Mohun Bagan leh Mohammedan bakah Goan club ṭha Churchill Brothers leh Salgaocar te a enkawl. East Bengal-a a awm lai hian hming a chher takzet a, kum 2003 khan ASEAN Club Championship-ah a champion pui.

Mizo football legend Mama chuan, "Tun hma kha chuan East Bengal leh Mohun Bagan hi an lian fal a, player ṭha tawh sa awmna a ni ṭhin. JCT emaw club ṭha dangah an ṭha tih an pholan khan Kolkata club khan an la chauh zel. Amaherawhchu Bhowmick hian TFA-a ka awm lai khan ka theihna kha min ring tawk a, player ṭha rual zinga khel turin East Bengal-ah min lalut.

"East Bengal-a player ho kha Bhaichung Bhutia, Mike Okoro, Douglas Silva, Alvito D'Cunha, Cristiano Junior, Suley Musah, Mahesh Gawli leh Deepak Mondal te ho kha an ni a, an ṭha em em vek. Player ṭha rual zingah min ring ngam a, season hmasa berah Kolkata Derby-ah goal ka khung hial. Ka tan chuan Bhowmick hi a hlu em em a ni," tiin Vanglaini a hrilh.

Bhowmick vuinaah hian East Bengal-in ASEAN Club Championship-a champion player-te an kalna leh hawna tumsak vek. Mama chuan, "Covid-19 hri leng karah pawh ni se Bhowmick hi chu ka thlah ngei a ṭul. Kolkata-a engkim min lo buaipuitu Pu Biaka (Mizoramin Santosh Trophy nomawi an chawi ṭuma manager) ka lawm bawk," tiin a sawi a, Bhowmick-a'n ṭawngkam a chungah ṭawngkam chhia a hman ngai loh thu a sawi bawk.

East Bengal hian Bhowmick hnuaiah National Football League-ah vawi hnih an champion a, heng bakah hian nomawi ṭhahnem tak an chawi. Bengali coach Bhowmick bawk hi Mohun Bagan-a Jeje Lalpekhlua laluttu a ni a, Mizo player ṭhahnem tak a enkawl tawh bawk.

Jeje chuan, "Bhowmick hi mi bik a ni a, a huaisen hle. Bagan-ah khan dressing room-ah club hruaitute an rawn lut ṭhin a, Bhowmick-a awm hnuah erawh tumah an rawn lut ngai lo. Club thuneitute pawh a ṭul chuan a hmachhawn ngam a, player a chhan em em bawk," tiin Vanglaini a hrilh.