AFCON: Final luh inchuhin Burkina Faso vs Senegal

Africa Cup of Nations semifinal chu zaninah khelh ṭan a ni dawn ta a, zanin dar 12:30 hian final luh inchuhin Burkina Faso leh Senegal ten semifinal hmasa zawk an khel ang.

Team pahnih squad chhah dan en chuan Senegal chunga rinna nghah mai chu thil awlsam a ni a, mahse, Burkina Fason-in semifinal meuh an luh tawh avangin chuti maia awlsam chuan AFCON mangṭha an duh bik lo ang.

Les Étalons (Burkina Faso sawina) hi African football thiam ram anga sawi ni ngai lo mah se AFCON-ah an sulhnu a chhe hran lo a, kum 2013 phei kha chuan final an lo khel hial tawh - tunah chuan nomawi an mitthla ang.

Ram langsar tak ni mah se Senegal-in final vawi hnih an lut tih loh chu AFCON-ah chhuan tur an nei lo a, an la champion lo - star player rual kawltu team tan tun hi champion tura hun ṭha a ni a, chumi tur chuan semifinal-ah an chak phawt a ngai.

Senegal an ṭha
AFCON-ah team thlan tur ni se, Senegal aia duhthlan tur an tam chuang lo - tlarhma ho turin Liverpool forward Sadio Mané an nei a, Villarrea forward Boulaye Dia, Watford chhuanvawr Ismaïla Sarr leh Alanyaspor hmatawng Famara Diédhiou te pawh rintlak tak an ni.

Midfield-ah Paris Saint-Germain midfielder Idrissa Gueye hoin Leicester City midfielder Nampalys Mendy, Marseille midfielder Pape Gueye leh Crystal Palace midfielder tawnhriat nei ṭha Cheikhou Kouyaté te ho an intlar thei a, ngaihtuahawm lo tak an ni.

Tlarhnung en ila, si ban nghak turin ani aia duhthlan tur awm chuang lo Édouard Mendy an nei a, a hmaah Napoli defender chhuanvawr Kalidou Koulibaly a din bawk avangin Burkina Faso tlarhma lam tan chuan tawn tlang an harsa ang tih a chiang.

Nancy defender Saliou Ciss, Bayern Munich right back Bouna Sarr, Paris Saint-Germain centre back Abdou Diallo te pawh bul ṭan leh tura beisei an ni a, Senegal squad en ila, AFCON-a champion turin an ṭha tawk.

Senegal an vannei?
Mane leh a ṭhiante ṭhat thu kan sawi rualin an vanneihna erawh hmuh hmaih theih a ni lo a, group B-a hmahruaitu ni chungin last 16 lut mah se group stage-ah hian goal khat bak an khung lo - chu pawh penalty hmanga Zimbabwe laka an khung a ni!

Senegal hian group stage-ah Zimbabwe hnehin, Guinea leh Malawi chu goal khung loin an inhnehtawkpui a, inchhuanpui tur an nei tam lo hle. Senegal hian an tlarhnung ṭhatna chu an vanneihpui, tiin a sawi theih.

Last 16-ah lah team tenau Cape Verde an tawng a, 2-0 in an hneh. Quarterfinal-a team tum châkawm ber pawl thlan tur ni ta se, a tam zawkin Equatorial Guinea an thlang ang - he team hi Senegal-in an chang chat a, 3-1 in an hneh.

Result enin Senegal tlarhnung lamin an hna an thawk ṭha tawk a, tlarhma lamin an tih tur an ti tawk lo. Semifinal a nih tawh avangin Mane leh a ṭhiante tan tlarhnung ringawta innghah a rem tawh dawn lo a, tun hi an theihna tak tak pholan hun a ni.

Burkina lam hi...
Senegal nen khaikhin chi an ni lo - team pahnih squad a inchhah hlei a, mang rama cheng Burkina tan chuan vanneihna leh thil mak chu beisei tur langsar a ni. Chutihrual chuan he team hian AFCON an hmachhawn hnuhnung pathumah vawi hnih chu semifinal an lut tih hriat a ṭha.

Tlarhmaah Aston Villa forward Bertrand Traoré chu innghahna tur a ni leh dawn a, semifinal-a Tunisia laka goal awmchhun khungtu Dango Ouattara erawh hnawhchhuah a nih avangin an chhawr thei dawn lo thung.

Tunisia laka an khelh dan enin tlarhnunga ding khawng tak Cyprus club Aris Limassol defender Steeve Yago, Bayer Leverkusen centre back Edmond Tapsoba, Morocco club FUS Rabat centre back Soumaila Ouattara leh Ligue 1 club Troyes right back Issa Kabore te an inkawp leh a rinawm.

Burkina-in player langsar sawi vul chuk tur an nei hran lo a, mahse, inelna hrang hranga an match hnuhnung 11-ah vawi khat khat chiah an tlawm avangin thawhhona ṭha chu an thupui tur a ni leh ngei ang - Senegal nen an intawn vawi 12-ah vawi sarih draw result a awm a, vawi hnih an chak a, Senegal vawi thum an chak. An inngam tawk ṭhin hle tih ilo theihnghilh palh ang e!

Semifinal
Zanin Inkhel Tur
Burkina Faso 12:30 AM Senegal

February 3, Ningani Zan
Cameroon 12:30 AM Egypt
* Inkhel hi YouTube 'CAF TV' ah a en theih.