One in Christ an thiam ber

Ṭhazual Award pawh lo dawng tawh One in Christ chuan 'Lalpa phut' tih hla hmangin Hontrade International Ṭhazual Fakna chart-ah No.1 an hauh.

One in Christ hian ṭhazual chart-ah dinhmun sang ber an lo luah fo tawh a, an hla te hi mipuiin an ngaithla nasa hle tih a lang. Tun ṭuma mi 'Lalpa phut' tih pawh hi fakna hla thlan hlawh ber a ni mek a, engtia rei nge No.1 a hauh theih dawn tih chu hriat chakawm tak a ni.

One In Christ hian tun hnai khan music thar 'Lalpa ka chhuang che' chu an tichhuak leh tawh bawk. Hei hi kumina an music video palina leh an project lian ber a ni nghe nghe. A hla hi Lalliani phuah a ni a, recording leh music hi Studio A-16 te kutchhuak a ni.

Tun ṭum chart-ah hian Felfeli Ralte chuan 'Lalpan a pui ang che' tih hla hmangin pahnihna a hauh a, Judith Lalremruati chu pathumna a ni. Felfeli hian hma a sawn hret hret a, dinhmun snag ber luah turin pen khat chiah a mamawh tawh a ni.

Hetih lai hian Judith-i hi tun hnaia No.1 hauh thei kha niin, a hla hit 'Kan famkimna' a hlawhtlinpui hle. He hla hmang hian chart-ah hun rei tak chhung a lang tawh a, top 3-ah a la lang thei cheu a ni.

PC Vanlalhriati (Tenu-i) chu palina-ah awmin, Mizo Idol star Thawhlehnaniropuia (Puipuia) chuan a dawt a ni. Tenuni hian 'Ka hria a sin' tih hla hmangin a dinhmun a sawhnghet mek a, hma pawh a sawn chak viau bawk.

Ṭhazual chart-a mikhual lo tak Amtea chuan 'Engkim ka hlan a che' tih hla hmangin parukna a hauh a, a hnuaiah hian Grace Lal­chhanhimi leh Stacy V.L. Muanpuii te an awm. Mizo Idol 2014 Grace-i hian kumin a music video hmasa ber 'Rinna mitin ka thlir ṭhin' tih chu tun thla tir lam khan a tichhuak a, chart-ah pawh kan hmuh thuai a rinawm.

Top 10-ah hian chart-a No.1 lo hauh tawh ve ve - Jennie Lalruatfeli leh Hlimhlimi te chu an lang bawk.