Kerala state dinthar leh nan Rs vbch 25,050 ngai dawn

World Bank chuan ruahsur leh tuilian-in Kerala state-a chhiatna nasa tak a thlengte din thar lehna atan cheng vaibelchhe 25,050 a ngai dawn niin a chhut.

World Bank leh Asian Development Bank team-te chuan Kerala-a tuilenna bialte tlawhin, secretary leh district collector-te an kawm a, hemi hnu hian report hi siamin Chief Secretary Tom Jose hnenah an pe a ni.

Report an thehluhah hian kawng chhia siamṭhatna turin cheng vaibelchhe 8,550, thingtlang khuaa infrastructure siamṭhatna atan heng vaibelchhe 5,216 leh tuilian tuarte intunnunna atana mamawh pekna turin cheng vaibelchhe 3,801 te a ngai dawn niin an tarlang. Tuilianin in a tichhiatte sakṭhatna atan cheng vaibelchhe 2,534 bakah khawpuia building pawimawhte sakna turin cheng vaibelcheh 2,093 a ngai dawn tih an sawi bawk.

Kerala state-in tuilian vanga chhiatna nasa tak a tawh aṭangin thla khat a liam tawh a, mipuite pawhin nunphung pangngai an zawh chho leh mek. Hetihlai hian Indian Meteorological Department (IMD) chuan September 25 leh 26 hian Pathanamthitta, Idukki, Wayanad leh Thrissur district-ahte ruah nasa takin a sur leh dawn niin an sawi. Heng district-ahte hian ruah hi mm 64.4 aṭanga mm 124.4 thleng a sur thei dawn niin an tarlang.

Chief Minister Office chuan State Disaster Management Authority hnenah district thuneitute chu lo inralring tura hriattir turin a hrilh a, a ṭul anga chhiatna thleng thei tur laka lo inven dan turte ngaihtuah turin a ti a ni.