Fuel man to belh zel

Ramchhunga fuel man sang zel chuan ziaawm lam a la pan thei lo a, nimin thleng khan a to belh zel a, Mumbai-ah chuan petrol litre khat man Rs 90.08-ah a kai chho tawh a, diesel litre khat Rs 78.58 a ni bawk.

New Delhi-ah petrol man hi litre khat Rs 82.72 niin, diesel man litre khat Rs 74.02 a ni.

Fuel man sang zelin mipuite tana harsatna a thlen avangin West Bengal sorkar chuan September 11 aṭang khan petrol leh diesel-ah chhiah lak chu litre khatah Rs 1 zelin a tihniam. Karnataka sorkar pawhin an state bikah petrol leh diesel man hi litre khatah Rs 2 ve vein a tihniam tawh bawk.

Eptu party te chuan ramchhunga fuel man sang zel chungchangah BJP kaihhruai sorkar laipui chu hma la ṭha tawk loah puhin, fuel man sang zel duh lohna lantirin rampum huapin bandh pawh an lo huaihawt tawh bawk. Hetihlai hian sorkar chuan khawvel huapa crude oil man san vang leh, rampawn lam kaihhnawih thil vangin petroleum product-te hi a man a sang chho niin a sawi thung.

Department of Economic Affairs Secretary Subhash Chandra Garg chuan Iran aṭanga oil lakluh tihtlem a nih dan tur chungchangah US nen inbiakna an nei mek niin a sawi.