Arsenal chak zanah Chelsea an chelh

Arsenal chuan Premier League match li chhung hnehna an chang zawn ta. Unai Emery naute hian an mikhual Everton 2-0 in an hneh a, tun season chhunga a vawi khat nan goal chhuah loin hnehna an chang - point 12 hmuin parukna an ni.

Pathianni zan inkhel dangah Chelsea chu West Ham nen goal awm loin an inhnehtawk a, Maurizio Sarri nau ten 100% chak record nei chunga season bul an ṭan kaltluang chu a tawp. Blues chungah point la hloh lo Liverpool leh an point hmun ang hmu ve tho Manchester City te an awm.

Laipui a puak
Emirates Stadium-ah mikhual Everton an hlauhawm hmasa zawk, mual sira changtu nei lo Dominic Calvert-Lewin-a'n box chhung thlengin ball tlan pui thei mah se keeper Petr Cech a paltlang thei lo. Hremna hmang zo hlim Richarlison pawhin hun ṭha neiin goal zawnah na takin pet mah se Cech bawk a paltlang zo bik lo.

Second half-ah Arsenal an insiamṭha a, rang tak taka ball inpe kualin hmun ruak an zawng. Minute 56-naah Aaron Ramsey-a'n Alexandre Lacazette hmu fuhin ball a pe a, Lyon striker hlui hian mawi zetin goal kilah a pet kum lut.

Everton an insiamrem hman lo, goal luh aṭanga minute thum hnu lekah Ramsey bawkin Pierre-Emerick Aubameyang goal khung tur a siamsak leh, Gabon international hi a offside ngei niin lang mah se pawm sak a ni - an goal hnihna luh kawngah Mesut Ozil chu sulsutu a ni, thui tak ball a tlan pui hnuah a ṭhiante tan pass fuh bik a nei a ni.

Hnehna chang mah se Arsenal hi inchhuang thei an ni bik lo, keeper Cech-a'n an lama lut tur ṭha zetin vawi ruk ngawt a dang thei a, Lacazette goal khung danah sawi buai tur awm lo mah se an goal hnihna erawh referee thutlukna tihsual vang a ni.

Arsenal manager Unai Emery chuan, "Min ṭantute tan hnehna chan ngei kan duh a, kan duh angin thil a thleng. A nihna takah chuan hun chanve hmasa kha chu kan khel ṭha tawk lo, kan keeper khan min chhanhim a ni. Inkhel kan thunun hnuah erawh goal kan khung a, kan chhuah lo bawk. Kan tan ni hlimawm tak a ni," tiin a sawi.

Everton boss Marco Silva erawh an dinhmunah a lungawi lo. Silva chuan, "Inkhelh chhung khan hun ṭha vawi nga chuang kan nei a, result hian inkhel chanchin a sawifiah tawk lo. 1-0 a nih laiin offside hmangin goal an khung a, kha khan thil a ti harsa zo vek. Ka naute khan hna an thawk ṭha hle a, mahse kan khingpui keeper kha a khel ṭha ber a ni miau a, goal kan khung lo," a ti.

Blues an chelh
A zawna EPL match nga an chak hnuah Chelsea-in goal an khung lo a, Blues manager Sarri-a'n a sawi lawk tawh ang ngeiin Europa League khelh zawh hnu lawka Premier League match hautak khelh zui chu a awlsam lo tih a lang.

Europa Leaue lama chhawr loh Eden Hazard hoin bul ṭan mah se Chelsea an hriam tawk lo, striker palian Olivier Giroud pawhin kawng a sial kaw thei bik lo a ni. Bench aṭanga lut Alvaro Morata leh Ross Barkley ten Hammers goal-ah ṭha zetin pet mah se keeper Lukasz Fabianski-a'n a dan sak hman zel.

West Ham tan midfielder Michail Antonio-a'n hnai set sawt aṭanga a pet chu keeper man tam Kepa Arrizabalaga fakna mai a ni a, winger Andriy Yarmolenko-a ball tauh erawh khawvel keeper manto berin en liam tawp tawh mah se goal ban hrulah a kal liam hlauh - Blues an vannei hle.

Chelsea manager Maurizio Sarri chuan, "Kan khel chhe lo a, chutih rualin kan khelh ṭhat ber ṭum chu a ni lo, ka aia ṭha zawk khan kan khel thei. Hun ṭha tam zawk insiam sak tur chuan kan chet ran leh zual a ngai dawn a ni," a ti.

An khelmuala an match hmasa pahnihah West Ham an tlawm a, Chelsea laka point hmuh hi an tan result ṭha a ni. Hammers manager Manuel Pellegrini chuan, "Match hmasa panga aṭanga goal 14 khung thei lakah point kan hmu, keini lamin clear chances vawi hnih kan neih laiin vawi khat an nei thung," tiin London Derby-ah team chungnung zawk an awm bik loh thu a sawi.