MPL-ah an intawng dawn ta ; Electric Veng Vs Chanmari

Mc Dowell's No. 1 Soda Mizoram Premier League Season 7-ah tun hmaa tualchhung football-a veng inhal tia sawi ṭhin Electric Veng leh Chanmari te an inkhel dawn a, team pahnih hian boruak dang an neih sa avangin zanin dar 7:00-a inkhel tur hian ngaihven a hlawh sawt ang.

Team pahnih hian MPL khelh mekah point sarih hmuin pahnihna leh pathumna dinhmun an hauh mek a, I Day Football-ah goal awm loa an inhnehtawk bawk avangin MPL vawi hnih champion tawh Chanmari hi inchhuang thei an ni lo ang.

Boruak chu..

Tualchhung football inelna ngaihhlut ber ni ṭhin CYMA football-ah Electric Veng-in 1989 final-ah Chanmari 2-1 in an hneh a, an champion. Electric Veng hi 1989 bakah hian 1997 leh 1998-ah an champion a, 2010 khan Red Ribbon Football-ah champion-in sial an kai haw.

Chanmari hian kum 1989-a Electric Veng an hneh loh hnuah final lut nawn mah se Dinthar hneh loin pahnihna an ni. Amaherawhchu football thiam veng muthlu chu Red Ribbon Football hmangin kaihthawh a ni a, kum 2012 khan Durtlang hnehin a champion a, MPL ṭan kum a nih bawk avangin he nomawi hi tun dinhmun an thlen theihna tura cho phurtu a ni a, Electric Veng an lehthal ṭanna tiin a sawi theih bawk.

Electric Veng an tho

MPL7-ah Electric Veng an rawn lang a, top flight football an khelh hmasak ber I Day Football-ah Aizawl FC hnehin bul an ṭan a, I League club hi MPL match hmasa berah an hneh leh bawk.

MPL club thar hian Chanmari FC an tum hmasak ṭum hian an draw a, tun ṭuma an intawn hma hian AFC leh Mizoram Police an hneh tawh avangin an ṭhenawm veng hi an hneh thei tih an hria ang.

EFC head coach Vanlalsawma Colney chuan, "Chanmari hi kan dah sang a, Aizawl FC leh Police nen inang khatin kan en. Fimkhur takin kan khelh a ṭul a, Chawnpui nen erawh kan naute rilru kan hmin zo lo. MPL club thar an nih ve tho avang khan kan zuam deuh a ni. Chanmari erawh team ṭha an ni," tiin Vanglaini a hrilh.

Electric Veng tan Chanmari nen an intawn hmasak ber ṭuma man of the match C. Laldinmawia chu dam chian loh vangin bul ṭan lo thei dinhmunah a ding a, winger ṭha Lalhmangaiha dinhmun a chiang lo niin Sawma hian a sawi bawk.

Chanmari lam hi...

Chanmari coach Lalruatliana Sailo chuan, "Electric Veng team balance hi a ṭha a, kil tinah player tawnhriat nei ṭha an kawl a, an tawh a khirh hle. Keini lam pawh Rosanga hremna a zo chiah dawn a, kan kim leh ṭan tawh avangin hmasawnna a awm turah chuan ka ngai," tiin Vanglaini a hrilh.

Chanmari hian match hnuhnung berah Bethlehem Vengthlang an hneh hram a, amaherawhchu MPL vawi hnih champion tawh hian nomawi chawi tawh player an kawl nual avangin rinkai zawk an ni dawn. Chutihrualin tun MPL-a match zawng zawnga goal la khung Lalnunzama leh BVT laka chakna goal khungtu Mark Zothanpuia te chu football zinkawnga rahbi thar zawh ṭan chauh an la ni.

Coach Tawia chuan player pahnih ten pressure an neih loh nan rinrawl an la nih loh thu a sawi a, hetihlai hian Electric Veng coach Sawma chuan, "Zama a chet ṭhat lai a ni a, kan tan chuan a harsa ang," tiin awmze nei takin Chanmari rawlthar chungchang a sawi.