Goal nawr a ngai - Pogba

Manchester United midfielder Paul Pogba chuan an khelmuala an inkhel a nih chuan goal nawr a pawimawh thu a sawi a, a venhim ngawt ni loin a khung lama beihpuih thlak a duh.

Jose Mourinho kaih-hruaina hnuaiah Man United-in attacking game an khel ngai lo a, club lian leh te an hmachhawn ṭum pawhin anmahni goal venhim chu an hnapui hmasa a ni ṭhin. Match ṭhenkhatah hlawhtlinpui mah se chet fuh loh ṭum pawh an ngah.

Premier League an match hnuhnung berah Wolves nen 1-1 in an inhnehtawk a, an inkhelhna hi Old Trafford a nih avangin United tan result ṭha a ni lo - hmahruaitu Liverpool aiin point riat zetin an hnufual tawh.

Man United midfielder Pogba chuan, "Wolves laka kan khelh aia ṭha zawk khan khel thei kan ni, kan muala khel kan nih chuan goal kan nawr na turah ka ngai. Team ṭhenkhat chuan Manchester United attacking game hi an hlau ṭhin ang, Wolves lakah chuan kan tisual a ni," a ti.

An khelmuala an khelh dan chungchang sawi zuiin Pogba chuan, "Season hmasa khan Old Trafford-ah Tottenham, Liverpool, Chelsea leh Arsenal kan mikhual ṭumin kan nawr ngam a, khatiang bawk khan attacking game hi khel leh ila kan rilru put hmang pawh a dik ang," tiin attacking game khelh a duh thu a sawi.