League Cup ; Lampard leh Mourinho intawng dawn

Zanin dar 12:30-ah Manchester United chuan League Cup third round match an khel dawn a, an mikhual tur hi championship club Derby County an ni.

Chelsea legend Frank Lampard-a'n inkhelh a chawlhsan tawh a, tunah chuan Derby manager a ni tawh. Old Trafford-ah amah siam liantu anga chhal theih Jose Mourinho enkawl Manchester United a hmachhawn dawn.

London club Chelsea 'vul' lai ber anga chhal theih chu Lampard leh Mourinho hian an lo tawng dun tawh a, tunah chuan chungnung zawk nih inchuhin an inhmachhawn dawn ta.

Lampard chuan, "Mourinho tawn hlan ka nghakhlel tawh a ni," tiin phur taka United khelmual an pan tur thu a sawi a, football khawvelin 'mi pahnih' vangin he inkhel hi a nghakhlel lehzual.

Lampard leh Mou
Kum 40 mi Lampard hian 2001 khan Chelsea a pan a, Mourinho hian 2004 khan a pan thung. Kum 2007 thleng an inhrawn hnuah Mourinho a chhuak a, 2013-ah a lo kir leh - Lampard a lo la awm reng a, season khat an inhrawn leh hman.

Lampard leh Mourinho hian Premier League nomawi pahnih, FA Cup (1) leh League Cup (2) an chawi dun hman a, Mourinho hnuaiah Lampard hi player pawimawh a ni reng a, Portuguese manager ropuina belhchhahtu zingah a tel.

English midfielder chuan, "Mimal tak pawhin Mourinho hi ka career-a manager pawimawh ber zinga mi a ni. Tun hnaiah pawh min rawn bia a, mahse chhungkaw chungchang kan sawi. A hnen aṭang hian thil tam tak ka zir a, ka ngaihlu em em a ni," a ti.

United hneh turin...
Derby County-in season tharah Premier League khelh ngei an duh a, coaching lamah tawnhriat nei tlem mah se player anga a tawnhriat ropui tak avangin Lampard an lalut a, parukna dinhmun an hauh mek.

Lampard naute hian parukna dinhmun luah mah se hmahruaitu Leeds United an phak lohna chu point hnih chauh a ni a, league match kua an khelh tawhah vawi nga hnehna changin vawi thum an tlawm a, vawi khat an khingpui an inhnehtawkpui.

Kum 40 mi manager chuan, "Kan hmaa ding tur hi team ṭha tak, Manchester United an ni tihah kan chiang a ni. Premier League team ṭha ber pawl kan hmachhawn tur hi kan tan chuan chona ropui tak a ni," a ti a, United nena an inkhel tur chu hnual nan ni loin chona atan a hmang.

Lung hlui a leng...
Jose Mourinho chuan a player hlui hmachhawn a chak thu a sawi. Portuguese manager chuan, "Lampard nena kan intawng tur hi a hlimawm khawp mai. Porto leh Chelsea ka enkawl tirha ka player-te khan an career an hmang zo tawh hlawm a, manager an awm nual tawh a ni.

"Frank hi ka player hlui, manager an nih hnua ka tawn hmasak ber tur a ni a, manager nih kha a chak fo ṭhin avangin thil mak pawh a ni lo. Engpawhnise, Championship club tan chuan Premier League club tum hi chona ropui tak a ni fo a ni," tiin fimkhur a ngaih thu a sawi tel nghal.

United hian an league match hnuhnung berah Wolverhampton Wanderers chu 1-1 in an inhnehtawkpui a, league-ah pasarihna ni mekin hmahruaitu Liverpool chu point riatin an phak lo tawh - zaninah Derby an hneh loh chuan Mourinho dinhmun ṭha tawh lo sa a ṭhat loh belh ang.

Inkhel dang
Cardiff City sawp hlim Manchester City chuan zanin dar 12:15 hian Oxford United an lenchilh dawn a, City lenna tur hi League One club an nih avangin Pep Guardiola leh a nauten hnehna chang turin harsatna an tawh a rinawm loh.

Zanina Premier League club inlan tur zingah Burnley chuan League One club Burton Albion an lenchilh dawn a, Bournemouth-in Blackburn Rovers an mikhual ang a, West Brom khelmualah Crystal Palace an leng bawk ang.

United nena inhnehtawk hlim Wolves tan fixture a awlsam lo a, anmahni ang thoa Premier League club Leicester City an mikhual dawn avangin chak tur zawk rin thiam a harsa hle.

League Cup Third Round Fixture
Zanin Inkhel Tur
Burton Albion 12:15 AM Burnley
Wycombe Wanderers 12:15 AM Norwich City
Oxford United 12:15 AM Manchester City
Millwall 12:15 AM Fulham
Bournemouth 12:15 AM Blackburn Rovers
Preston North End 12:15 AM Middlesbrough
Wolverhampton 12:15 AM Leicester City
Blackpool 12:15 AM Queens Park Rangers
West Brom 12:30 AM Crystal Palace
Manchester United 12:30 AM Derby County
September 26, Nilaini Zan
Arsenal 12:15 AM Brentford
West Ham United 12:15 AM Macclesfield Town
Liverpool 12:15 AM Chelsea
Nottingham Forest 12:15 AM Stoke City
Tottenham Hotspur 12:30 AM Watford