Juventus chakna Cristiano Ronaldo

Hun tawp hma minute kua chauh a awm tawh tihin Cristiano Ronaldo-a'n goal hmahruai a khung chauh a, Italian champion chuan 100% chak record an neih lai chhawm nung turin Frosinone 2-0 in an hneh thei tho.

Pathianni zan Serie A inkhelah Frosinone keeper Marco Sportiell a khel ṭha a, ani hian hnai tak aṭanga Ronaldo khung tur vawi hnih a dan sak. 72% zet ball possession neitu Juve tan Alex Sandro pawh a vannei tawk lo, goal ban tih perin point hloh mai thei dinhmunah an ding hman.

Mahse, hun harsa kara Real Madrid chandam fo tawhtu Ronaldo a bo hlen lo. Portuguese forward hian yard riat vel chauh hla aṭangin a khung a, hun tawp hma deuh chiahin Federico Bernardeschi chuan Turin khaw club chakna goal a khung zui bawk.

Italian champion lam hian inkhel thunun viau mah se Frosinone an ṭang rei thei hle, tlarhnung an inrem phui thei viau - Massimiliano Allegri nau teng goal khung tuma vawi 30 an pet zinga pariat chu goal zawnah a kal, hlauhawm a thlen hmain an chingfel hnem hle - a tawpah erawh an inveng seng lo.

Juve manager Allegri chuan, "UCL khel zo hlim kan nih avangin hetiang match hautak khel tur hian kan inring lawk a ni. Frosinone kha an teirei peihin an thawkrim em em a, hetiang match bika hnehna chang tur chuan vanneih tel pawh a ngai," tiin a sawi.

A zawna vawi sarih champion tawh Bianconeri hian match nga khelhah point 15 hmuin hma an hruai chhunzawm a, anmahni haih bertu Napoli aiin point thumin an sang zawk. Serie B aṭanga kai sang hlim Frosinone erawhin point khat hmuin a hniam ber dawt an ni, an hnuaiah hian -1 hmutu Chievo an awm; Chievo hi an sum dinhmun a ngelnghet ṭhat tawk loh vanga hrem nan point paih sak an ni.