Iran chelhtu India rawlthar

AFC Under 16 Championship kheltu Indian rawlthar rual ten result duhawm an nei zel a, match hmasa bera Vietnam U16 an hneh hnuah nimin khan Iran an inhnehtawkpui a, quarterfinal lut turin an dinhmun a ṭha hle.

Iran hian minute 76-naah goal khungna remchang nei mah se goalkeeper Niraj Kumar chuan penalty a dang a, kum 33 hnua a vawi khat nan India-in eng 'level'-ah pawh a vawi khat nan Iran an inhnehtawkpui.

India U16-ah hian Mizo pali awm mah se starting XI chang phak an awm lo a, match hmasa ang bawkin Lalchhanhima Sailo chu bench aṭanga luhtir niin Armed Veng tlangval hian a goal khungna remchang neih erawh keeper a tlan hel hnuah a khung thei lo.

Blue Tigers rawlthar rual hian Ningani zan dar 6:15-ah Indonesia an hmachhawn leh dawn a, inkhel dang result a zirin draw result pawh tlang nan a tawk ang.

Group C Dinhmun
# Team Pld W D L GF GA GD Pts
1 India 2 1 1 0 1 0 1 4
2 Indonesia 1 1 0 0 2 0 2 3
3 Iran 2 0 1 1 0 2 -2 1
4 Vietnam 1 0 0 1 0 1 -1 0