Barcelona an chelh - an fâl ta lo!

Pathianni zan La Liga in­khelah Barcelona chelh dinin an awm a, an mikhual Girona nen 2-2 in an inhnehtawk - league match li chhung an chak zawn tawh chu a tawp a, Real Madrid nen an point hmuh zat a in ang.

Barca tana a vawi khat nana league match bul ṭantu Clement Lenglet chu Lionel Messi-a'n goal hmahruai a khung hnuah red card pek a ni a, Girona chuan hei hi chhawr ṭangkai nghalin Cristhian Stuani hmangin goal hnih an rawn khung nghal.

Nou Camp-ah mualneitu team tan Gerard Pique chuan minute 63-naah si phurh sutna goal a khung a, goal dang lut tawh loin an ṭin a, Barca-in tun season La Liga-ah a vawi khat nan point an hloh ve ta.

Messi leh record

Lionel Messi leh record hi thil thar a ni tawh lo. Argen­tine striker hian Girona a hmachhawn khan La Liga match 423 a khelhna chiah a ni a, Spanish player ni lo zinga La Liga-a inlan hnem ber a ni - vawi 422 inlan Dani Alves record a khum.

Messi hian Girona lakah a record lawm nan goal hmahruai a khung a, Barca tan La Liga-ah ringawt goal 388 khungin assist vawi 166 a nei ta bawk - Barca tan league match 423-ah goal 554-ah 'direct'-in a inrawlh tihna a ni!

Kum 31 mi forward hian tun season bikah match sarih khelin goal riat a khung leh der tawh a, player tam zawk tana uaithlak hnaih tawh lam kumah pawh a la parvul zel.

Mahse maw...

Nou Camp-a khel an ni a, Barca-in Messi hmanga hma taka goal an khung bawk avangin awlsam takin hnehna an chang leh ngei dawn niin a lang. Mahse, minute 35-na lekah Barca tan beisei loh thil a thlang.

French defender Clement Lenglet chuan an khingpui player a nghawk lui nia ngaiin referee-in video assistant referee a rawn a, uluk taka a thlir hnua a thutlukna chu red card a ni - player pakhata tam zawk chunga khel Girona an phur sawt.

Uruguay forward Cristhian Stuani chuan minute 45-na leh 51-naah goal a rawn khung a, Catalan club an hawihai. Mahse, Barca-in tlawm duh lo zia chhuahin Pique hmangin an si phurh an sut leh a, chak tum ngei chunga Girona an nawr chungin goal dang erawh a lut tawh lo.

Red card chu

Lenglet hian Girona defen­sive midfielder Pere Pons chu a kiuin a nghawk lui nia ngai­in referee-in red card a pe a, VAR rawn thlap chunga referee thutluknaah Barca coach Ernesto Valverde a lungawi thei lo.

Kum 54 mi manager chuan, "VAR hi thutlukna dik tawk lo leh buaina awm ṭhin chinfelna tur emaw ka ti a, VAR an rawn khan Lenglet laka thutlukna dik lo siam nan an rawn dawn tih ka hre lo.

"Referee thutlukna kha hriat­thiam har ka la ti reng a ni. Leng­let kha mahni invenhim tum mai a ni a, Pere Pons kha a nghawk lui lo," tiin a player a chhan a, inkhel thlak danglamtu referee thutluknaah a lungawi lo hle.

Lenglet chhantu Pons!

Referee thutluknain sawi zui a hlawh a, Lenglet chhantu zinga mi chu referee-in French defender-in a nghawk luia a ngaih Pons a ni daih!

Spanish defensive midfiel­der chuan, "Lenglet nen khan ball chan ngei tumin kan bei ve ve. Kan taksa chu a in tawk ngei tih a chiang a, mahse ka thawh leh rual khan Lenglet hnenah khan ngaihdam ka dil zawk a, keimah zawk emaw foul ka inti hial a ni," a ti.

Kum 25 mi Pons chuan sawi zawmin, "Tumahin tihsual kan nei lo ve ve a, a tawpa thutlukna siamtu erawh VAR a ni. A kiua min nghawk lui anga min ngai a nih chuan min nghawk lai erawh ka hre fuh lo," a ti a, referee thutlukna a pawm lo.