US-ah kan inkhel lo ang - Real President
Real Madrid president Florentino Perez chuan USA-a La Liga club ten season tina match khat khel tura ruahmanna lo awm tawh chu an ṭawmpui loh thu a sawi a, "USA-a inkhel turin kan kal lo ang," a ti.
La Liga chuan media company Relevent chu kum 15 chhung atan contract ziahpuiin, club tin ten season tin match khat tal USA-a an khelh tur thu an sawi a, mahse he thutlukna hi Spanish FA leh Spanish Footballers' Union chuan an thlawp loh thu an sawi tawh a, FIFA president Gianni Infantino chu a thlawp lotu langsar zinga mi a ni bawk.
Florentino Perez chuan, "United States-ah kan kal lo ang. USA-a league match khelh hi tu duhdan ber nge a nih kan hre lo a, mahse fans leh player-te chuan an duh loh chian avangin keini pawhin kan thlawp lo a ni," a ti.
Thla hmasa khan Barcelona leh Girona chuan January-ah Miami khawpuia inkhelh an remti tawh a, USA-a inkhel tur hian La Liga thuneitute nen Spanish Football Federation (RFEF) hnenah dilna thlen tawh mah se RFEF chuan chiang zawka thil engkim hrilh an nih hma chuan club pahnih dilna hi an la phalsak theih loh thu an sawi.