India-in Asia Cup final an lut

Asia Cup final lut turin India-in Pakistan an sawp nawn a, Pathianni zan khan wicket 9-in hnehna an chang. Men in Blue hian Super Four match hmasa berah Bangladesh an hneh tawh a, final-ah hian Super Four match hnuhnung bera Bangladesh leh Pakistan chak zawk nen an inhmachhawn ang.

Dubai International Cricket Stadium-ah September 28, Zir­tawpni hian final khelh tur a ni a, kum hnih dana neih inelnaah hian India hi champion lai an ni.

Rohit & Dhawan

Virat Kohli tel lohna India team-in match hmasa berah Hong Kong an hneh ṭawk avangin sawisel hlawh mah se an chesual nawn tawh lo a, Super Four lut turin Pakistan an sawp. An target umpha tur hian over 29 chiah an mamawh a, over 21 bangin Men in Blue-in ball la chuang zat chhut a, Pakistan an sawp ber ṭum a ni.

Super Four-ah India-in Bang­ladesh an sawp nghal a, match hnihnaah hian Pakistan chu coin toss-ah chakin bat hmasak an thlang. Shoaib Malik-a'n run 78 a siam zarah over 50 chhungin run 237 an siam.

India bat hun a thleng a, bul ṭantu pahnih Rohit Sharma (111) leh Shikhar Dhawan (114) ten century an siam ve ve a, captain Rohit phei chu dam tluanin Ambati Rayudu-a'n run 12 rawn siam ve bawkin over 39.3 lekah an target an pha der a. Asia Cup-ah India an chungnung a, amaherawhchu final khelh a la ngaih avangin champion chiang tiin a sawi theih loh.

Hmabak

Vawiin tlai hian dar 5:00 hian India-in beisei tur nei tawh lo Afghanistan an hmachhawn ang.

Bangladesh hian Super Four match hnihnaah group match-a an hneh loh Afghanistan lakah phuba an la a, Afghanistan hian Pakistan an hneh tawh loh avangin an tla.