Khawvela football thiam ber Modric

Football khawvela thuneitu sang ber FIFA chuan khawvela footballer thiam rual chawimawina hun a huaihawt ṭhin chu Thawhṭanni zan khan a nei leh ta a, khawvel mipa footballer zingah Luka Modric aia thiam zawk an awm lo.

Croatian midfielder hian FIFA Player of the Year chawimawina dawng tur hian season hmasaaReal Madrid tana a khelhpui Cristiano Ronaldo leh Liverpool forward Mohamed Salah te a khum a ni.

Modric hian May khan season thum chhunga a vawi thum nan Real Madrid chu Champions League nomawi a chawipui a, Croatia chu a vawi khat nan World Cup final a thlenpui bawk.

Modric a lawm
Luka Modric chuan chawimawina a dawn zawhah lawmthu sawiin, "He chawimawina hi keima ta bik a ni lo a, Real Madrid leh Croatia tana ka khelhpuite nena kan thawhchhuah a ni. Ka coach-te puihna tel loin he chawimawina hi ka dawng lo ang tih ka hria a, ka chhungten min ṭawiawm lo ni se vawiina in hmuh player hi ka ni lo ang," a ti.

Tottenham Hotspur midfielder hlui hian World Cup khelh zawh takah khan player ṭha ber chawimawina Golden Ball a lo dawng tawh a, UEFA Player of the Year-ah thlan a lo ni tawh bawk.

Croatia manager Zlatko Dalic chuan, "Luka Modric hi ka team-a captain pawimawh a ni a, ka team-a player ṭha ber a ni a, he chawimawina dawn hi a phu takzet a ni," tiin a player a fak.

Sawisel hlawh chu...
FIFPRO World XI puan a ni a, sawisel a hlawh zui nghal - chawimawina sang ber Best Player dawng thei tura hming chhawpchhuah ni siin Salah chu World XI-ah a tel lo a, Real Madrid goalkeeper Thibaut Courtois chu keeper ṭha bera thlan a ni chungin World XI-ah David de Gea a lang daih!

Ronaldo leh Gareth Bale ten Champions League-ah goal mawi zet an khung chungin goal khung mawi ber lawmman 'Puskas award' chu Salah hnenah pek a ni thung - December-a Everton laka a goal khung kha he chawimawina a dawn chhan a ni.

Salah chuan, "Huai taka ka sawi ngam chu hei hi FIFA Awards-a ka nomination hnuhnung ber a ni dawn lo. Season tina hmasawn ka tum a ni," tiin a ṭawng huai hle.

Chawimawina dang
World Cup-a France champion puitu Didier Deschamps chu coach ṭha berah thlan a ni a, Champions League-a Real champion puitu Zinedine Zidane leh Croatia manager Zlatko Dalic a khum.

A season khatnaa Lyon hmeichhe team league leh Champions League-a nomawi chawipuitu Reynald Pedros chu hmeichhe team coach ṭha berah thlan a ni a, hmeichhe player ṭha berah Marta chu a vawi ruk nan thlan a ni bawk.

VVV-Venlo striker Lennart Thy chu leukaemia natna veitu hnena 'stem cell' a donate avangin Dutch league-ah PSV Eindhoven a hmachhawn thei lo a, Fair Play chawimawina pek a ni - World Cup-a an team ṭha taka ṭawiawmtu Peru fan-te chu FIFA Fan Award pek an ni.

FIFA Best Awards
Puskas Award
Mohamed Salah, Liverpool/Egypt
Men's Coach of the Year
Didier Deschamps, Coach - France
Women's Coach of the Year
Reynald Pedros, Coach - Lyon
Goalkeeper of the Year
Thibaut Courtois, Belgium/Chelsea/Real Madrid
Women's Player of the Year
Marta, Brazil/Orlando Pride
Men's Player of the Year
Luka Modric, Croatia/Real Madrid
FIFA FIFPro World XI
David De Gea; Dani Alves, Raphael Varane, Sergio Ramos, Marcelo; Luka Modric, N'Golo Kante, Eden Hazard; Lionel Messi, Kylian Mbappe, Cristiano Ronaldo.