Chhinga Veng an vannei a ni lo, inrintawkna an ngah - AFC coach

Zanin dar 7:00-ah hian Mc Dowell's No. 1 Soda Mizoram Premier League Season 7-ah champion rinkai pahnih Chhinga Veng FC leh Aizawl FC te an inhmachhawn dawn.

Chhingcows hian MPL champion turin I League club hi final-ah an hneh. he mi hnu hian an la chak chho chak chak a, nimahsela MPL7-a match thum an chakna hi goal khat vek a ni a, vanneih tiha sawi theih a ni. Amaherawhchu, Aizawl FC coach Gift Raikhan chuan, "Vannei maw, teuh lo mai. Hemi phenah hian inrintawkna leh thawhrimna a awm," tiin an khingpui tur a fak.

A ropui chuang e...

Chhinga Veng result hi tualchhung football hrechiang lo chuan a ropuina an pawh pha lo ang. Chhingcows hi a zawnin vawi 15 an chak tawh a, tualchhung football-a vawi khat chak harsat zia hre chin chuan Sanga, club hotu, player leh veng mipui te hnathawh fak loh chu tih theih dang a awm lo.

Season liam ta khan Chhinga Veng hi vawi 14 an chak zawn thei a, tunah chuan he record duhawm tak hi an hneh theih ngai loh Ramhlun North hnehin an khum. Nikum khan chak loh nei loin match 22 chhung an kal tluang a, tunah hian match 20 chhung chak loh nei loin an kaltluang tawh bawk.

Hetah hian a la tawp lo, Sanga hnuaiah hian Chhinga Veng hian match 43 an khel tawh a, vawi khat chiah an la chak lo a. Nomawi chawi theih zawng zawng an chawi vek a, MFA Super leh I Day Football-ah kum zawnin an champion a, MPL-ah a zawna champion an tum leh mek.

Mahse...

Season liam ta kan thlir let chuan Chhinga Veng chak zawn record tawpna chu Aizawl FC an ni a, an hneh loh awmchhun pawh I League club tho hi an ni a, chuvangin Gift Raikhan hote lakah hian Chhingcows tan fimkhur lehzual a ṭul ang.

Chhinga Veng coach Sanga chuan, "Aizawl FC leh Police inkhel kha ka thlir a, an vanneih ṭum chu ni se goal tam zawka chak thei an ni. Kil tinah an ṭha em em a, coach pawhin a player-te a hrechiang chho a, an ṭha tih kan hriat a ngai. Chuvangin point thum hmuh tum vangin kan nawr vak vak lo ang," tiin Vanglaini a hrilh.

Inkhel tur chu

Aizawl FC-in foreigner zingah Alfred Kemah Jaryan bak chhawr tur an la nei lo a, tlarhmaa an inghatna tur chu Kelkanga tlangval Lakhawpuimawia a ni dawn. Winger chhuak thar Isak Vanlalruatfela a hmuhnawm ṭhin a, Thingsulthliah rawlthar chevel hi a hlauhawm ṭhin hle.

Tlarhnungah Govin Singh a inhliam a, amaherawhchu Manipur defender hian a thawh hlawk hran loh avangin channa tia sawi tur a ni lo. Dempo goalkeeper hlui Gurpreet Singh erawh match hmasa ber a khelh aṭangin team tan a ṭangkai dawn tih a lang nghal.

AFC coach Gift chuan, "Chhinga Veng hi hneh ngei kan duh a, kan duh ang thleng tur erawh chuan kan khelh ṭhat a ngai ang," tiin champion lai hneh a awlsam loh tur thu a sawi.

Chhinga Vengin match hnuhnung ber khel thei lo MS Dawngliana, Lalrammuanpuia leh Lalremruata te zingah kumin I Day Football final-a chakna goal khungtu Dawngtea an chhawr thei dawn. Mahse Ramhlun North an khelh ṭuma chakna goal khungtu F. Zosangliana erawh inhliam vangin a inlan thei dawn lo.

Chhingcows coach Sanga chuan, "Zirtawpni tlaiah Mizoram Police nen kan khel leh dawn a, darkar 24 chauh chawlhna hun kan neih dawn avangin rilru chu a kap deuh. Chutihrualin kan player neih ang te a ṭha thei ang bera hman hi kan tih tur a ni," tiin a sawi.

Ngaihnawm
* Tun season-ah Chhinga Veng an la chak vek
* Sanga hnuaiah Chhinga Veng match 15 an chak zawn tawh a, match 20 chhung hneh loh nei loin an kaltluang tawh bawk.
* Aizawl FC hian season liam ta khan Chhinga Veng hneh loh nei lo a kaltluang an tihtawp sak.
* I League club hi Sanga enkawl Chhinga Veng hneh thei awmchhun an ni.
* Kumin I Day Football final-ah Chhinga Veng leh Aizawl FC te an inhmachhawn a, Chhingcows 1-0 in an chak.
* AFC coach Gift Raikhan hi season liam taa I League best coach a ni a, Chhinga Veng coach Lalsangzuala Hmar hi Santosh Trophy-a Mizoram team enkawltu niin tun dinhuna Mizo coach ṭha bera chhal theih a ni.