Sanchez an hralh mai thei - Ian Wright

Manchester United player zinga hlawh hnem ber Alexis Sanchez chu a khel ṭha chho zel a nih loh chuan an hralh mai thei niin Arsenal striker hlui Ian Wright-a'n a sawi.

Arsenal aṭanga Man United pantu Sanchez hian chawlhkar khatah £391,000 a hlawh mek a, Chilean forward hian United a pan hnuah inelna hrang hranga match 23 a khelh aṭangin goal thum bak a la khung lo.

Wright chuan, "Sumdawng chu ni ila, tun season a khelh chhoh dan ka thlir ang a, chumi hnuah thutlukna ka siam ang. A hlawh vang hian a chunga kan rilru put dan pawh player dang nena khaikhin vek theih a ni lo.

"Sanchez hian a hlawh phu angin a khel tur a ni a, club dang a zawm a nih pawhin chutiang tho tur chu a ni. Chutihrualin tun ang dinhmun a thlen theihna chhan hi ama thawhrim rah a seng tih erawh kan hriat tel a ṭha," tiin a sawi.

Tun season chhungin Sanchez hian match nga a khel tawh a, Champions League group match an khelh hmasak ber ṭumin bench-ah dah a ni; a aia lut Anthony Martial chuan goal a khung. Mahse, kar tawpa league match an khelhah erawh French forward hi a nek chhuak ve leh thung.

Arsenal striker hlui Wright chuan sawi chhunzawmin, "Martial leh Marcus Rashford te an awm avangin a dinhmun a nghet bik lo, a khelh ṭhat dana zira hmun chang a ni chho dawn tih pawh a lang," tiin a sawi.

Chelsea leh Blackburn striker hlui Chris Sutton pawhin Sanchez chuan inrintawkna a tlakcham thu a sawi a, "A tum a, mahse a la rawn thleng lo a ni. A lan dan chuan khawvel phurrit hi a phur emaw tih mai tur a ni. Arsenal tan kha chuan zalenna neiin hlim takin a khel a, tunah chuan khatiang kha hmuh tur a awm lo, a boruak tawn lai hi a her liam thuai ka beisei," a ti.