Tu zawk nge tho chhuak dawn? Mizoram Police vs Ramhlun North

Mc Dowell's No. 1 Soda Mizoram Premier League Season 7 ṭan hmain Mizoram Police leh Ramhlun North chu champion rinkai an ni a, tunah erawh an result avangin rinna a tlahniam ṭan.

Vawiin tlai dar 3:00 hian Police leh Ramhlun North te hi an inkhel dawn a, champion tum team pahnih hi tun dinhmunah chuan semifinal khel pha chinah pawh an awm lo. An awmna hmunin a zir loh avangin vawiin tlai inkhel tur hi a hmuhnawm khawp ang.

Police an ṭha maw?

Mizoram Police-in match hmasa berah Bethlehem Vengthlang goal khat chauhin an hneh a, hemi hnu hian MPL club thar Electric Veng (0-1) leh Aizawl FC (1-3) an hneh lo.

An goal khung dan thlirin Police dinhmun a lang. Season liam ta khan round 6 aṭangin Lalbiaksanga Colney rawng langin match ngaa point khat hlawh chhuak Police chu league round tawpah pathumna a nihpui phak.

Amaherawhchu tun ṭumah chuan khami ṭuma an midfielder F. Zosangliana leh defender Zomuanpuia te an kawl tawh lo a, defender Lalhmunmawia leh Lalbiakhlua (Hlutea) te squad-ah awm mah se Police training-naah an awm mek.

Police hi team ṭha tura ngaih ni mah se training-naa awm player ṭhate tel lo chuan season liam ta ṭantirh match ngaa point khat hmu team ai khan an ṭha lo zawk. Chutihrualin awlsam taka hneh theih tur erawh an ni lo, an tlarhma lam hi chu tarlan tawh ṭhin angin Mizoram tihmingṭha tawhtute an ni.

Ramhlun North hi...

Ramhlun North-in MPL-a chak dan thuruk an la hre lo a, season hnih an khelh tawhah semifinal an thleng lo. Tun season-ah beiseina sang tak nen bul an ṭan a, amaherawhchu vawi thum an khelh tawh aṭangin chak an la nei lo.

Ramhlun North coach F. Lalrozara chuan, "Chhinga Veng nen chuan kan duh dan angin kan inrem thei a, mahse inhliam an awm avangin a tawp lamah kan duh dan angin kan inrem thei lo. Police nen pawh inhliam vangin harsatna kan nei a, chuti chung chung chuan point hlawhchhuah erawh kan tum hle," tiin Vanglaini a a hrilh.

Police chungchang sawi zuiin Rozara chuan, "Tlarhnung ṭha ber an nei lo mai thei a, mah se an tlarhma te hi chu an khelh ṭhat niah chuan danglamna thlen thei vek an ni," tiin a sawi.

Season liam ta khan Ramhlun North hian Police hi MPL-ah ṭum hnih an hmachhawn a, an chak lo ve ve. An inkhel pahniha goal lut zat hi goal 12 lawih a ni a, BS-a hote hi 4-3 leh 3-2 in an chak.