Lakers ka pan chhan chu basketball - James

LeBron James chuan Los Angeles Lakers a pan chhan chu Hollywood boruak vang ni loin, a hma­ngaih basketball vang chauh a nih thu a sawi chhuak.

Basketball inelna sang ber NBA Most Valuable Player vawi li ni tawh hian July thla khan Lakers hi season li chhung atan a pan a, an inremna hi pound maktaduai 116 zet a tling.

Kum 33 mi James hi film leh project hrang hrangah a lo inrawlh tawh ṭhin a, hei vang hian LA a pan chhan hi basketball ai mahin Hollywood vang zawk a ni tia sawisel an awm a, zawhna pawh a dawng hnem hle.

Zawhna chhangin James chuan, "Ka duh­thlanna hi ka chhungkua leh Lakers vang chauh a ni. Basketball player ka ni a, ball hmanga infiam ṭhin ka ni. Thil dang ngaihtuah ni ila chuan hlawkna tur chu ka hmu ve bawk ang, mahse tunah chuan basketball hi ka dam chhan a ni," tiin a sawi.

James hian Cleveland Cavaliers leh Miami Heat tana a khelh laiin NBA Finals vawi riat ngawt a khel thei a, a club thar Lakers-in final an thlen hnuhnung ber chu 2010 daih tawh kha a nih avang­in atan nomawi chawi beiseina a sang rih lo.

Season thar thlirzuiin James chuan, "Golden State hi en teh u, an team a nghetin an changtlung hle. Chutihrualin hetiang dinhmun thleng tur hian hun rei tak chhung chu team an indin chho ve a ni. Anni nen chuan khaikhin chi kan ni lo a, mahse an thlen chin ang hi kan thleng ve thei," tiin a sawi.

NBA regular season hi October 16 aṭanga khelh ṭan tur a ni a, 10 April 2019-ah regular season bik chu a zo ang - season dang ang bawkin playoff an la khelh chhunzawm leh dawn a ni.