Tony Bellew v Oleksandr Usyk Hlauh ka nei si lo a, ka chawlh a ngai - Bellew

November 10-a Olek­sandr Usyk nena inhnek tur Tony Bellew-a'n vaupung a bei na a, "Hlauh ka nei si lo a, Usyk ka hneh hnuah chuan ka chawlh mai a ngai dawn a ni," a ti!

Boxer pahnih hi Man­chester Arena-ah an in­tawng dawn a, khawvelin he fight hi nghakhlel takin a thlir. Bellew chuan, "Inhnek chawlhsan vat hi ka tan a ṭha zawkin ka ring. Ka hmaa ding tupawh hmachhawn ka duh zel a, King Kong meuh pawh ni se ka hnek duh mai ang," tiin a sawi.

Ka nupui tan

Kum 35 mi boxer chuan a nupui vang pawhin a tan inhnek chawlhsan a finthlak thu a sawi a, "Hun engemawti aṭang khan chawlh hi ka lo ngaihtuah tawh. Inhnek hi ka chawlhsan thuai a nih loh chuan ka nupuiin min ṭhen mai ang. Mahse, chu chu thlentir ka tum lo," a ti.

Liverpool fighter hian press conference-ah a nupui hi boxing chawlhsan a lo tiam tawh a, "Bawihi, hei hi i lo en ve a nih chuan ka tiam a che. Tuna hi fight ka hmachhawn hnuhnung ber a ni tawh mai thei," tiin a sawi.

Bellew hian cruiser­weight aṭanga heavyweight kaisangin British boxer rothap David Haye chu vawi hnih a hneh a, cruiserweight lamah tla thla lehin Usyk hi a hmachhawn dawn a ni.

A tisual a ni

Kum 31 mi Oleksandr Usyk hian vawi 15 fight a hmachhawn tawhah a la tlawm miah lo a, mi 11 a knockout. Cruiserweight-a WBO, WBC, WBA leh IBF kawnghren kawl kim vek thei awmchhun ni turin July khan Murat Gassiev a hneh a, Bellew a cho thu a sawizui nghal.

Bellew chuan, "Honey­moon hmangin ka chawl a, ka phone hmangin Gassiev a hneh lai kha ka en. Mahse, a tihsual azawnga tihsual lian ber a siam ta a, ka hming a lam chhuak kha a pawi em em a ni," a ti.

Vawi 33 inhnek a hma­chhawna vawi hnih chiah la tlawm fighter chuan, "Usyk -a'n ka hming a lam rual khan khawvel hian min ring lo zawk dawn tih ka hre nghal. Mahse, min rin loh zawh poh leh ka phurna hi a zual si a ni," tiin Ukrainian fighter a cho hle.