Juventus an 100% zel dawn em?
Italian champion Juventus tan Serie A khelh kal laiah buaina tur a la awm lo a, match nga an khelh tawhah Turin club chiah hi chak vek awmchhun an ni. Zanin dar 12:30 hian Juventus Stadium-ah Bologna an lo mikhual dawn a, 100% chak record an neih lai an chhawm nung thei em tih chu fiahin a awm dawn.
Frosinone an hneh hnuah Juve captain Giorgio Chiellini chuan tun hnai season ṭhenkhat nena khaikhin chuan an ṭhat ber ṭum ni hialin a ngai a, Italian defender thu sawi pawmpuitu an tam a nih pawhin a mak lo ang. Tun hma lama an la neih ngai loh Cristiano Ronaldo an neih belh tawh miau a ni.
Kan ṭha tawk
A zawna season sarih zet champion thei an nih avangin Serie A roreltu an nihna hi tuma chuh buai phak a ni lo a, Bianconeri-in inrintawkna an neih hi a sang vet vet hle - club dang tana neih ve theih rih loh tur thil a ni.
Kum 34 mi Chiellini chuan, "Hmathlir kan nei ṭha a, chumi ti hlawhtling tur chuan kan rilru zawng zawng kan seng bawk. Inrintawkna kan neih miau avangin kan mamawh ang tawk goal chu kan khung leh mai ṭhin.
"Kan rilru puthmang hi kan nei reng tur a ni a, kan hloh a nih chuan kawng pawh a harsa ve nghal ang. Position tina kan player neih hi thlir ila, tun hnaia kan team ṭhat ber ṭum ang hialah ka ngai," tiin a sawi a, a thusawi hi season hmasa lama an elpui Napoli tan ngaihthlak nuam a ni lo ang.
Gianluigi Buffon chhuah hnuah Chiellini hi Juve captain nihna pek a ni a, tun hma lama a khelhpui tawh leh captain kal chhuak tate hnen aṭangin hruaitu nihna kawngah thil a zir hnem thu a sawi.
Chiellini chuan, "Gianluigi Buffon, Alessandro Del Piero, Fabio Cannavaro leh Andrea Pirlo te hnen aṭang khan thil tam tak ka zir chhuak a, a bik takin club tana an inpekna leh hmasawn an duhna kha ka thil zirchhuah ṭha ber ni hialin ka hria. Anni khan training-na hmunah pawh theihtawp an chhuah vek, football a nih tawh chuan tih mai mai a thiang ngai lo," a ti.
Ronaldo hoin
Champions League match hmasa berah Ronaldo hnawhchhuah a ni a, match khat chu an hrem dawn tih a chiang - match thum thlenga hrem theih a ni bawk. European football lama chhawr theih loh forward hi league lamah chuan inlan chhunzawm tura ngaih a ni.
Frosinone lakah goal hmahruai khungin Ronaldo-a'n hnehna an chan theih nan kawng a sial a, league match vawi nga a khelh tawh aṭanga goal thum khungtu hi Bologna tan dan awlsam tak a ni lo ang. Portuguese forward awm hma pawhin Juve hi an ngam ngai meuh lo, season hmasa khan 3-1 in an tlawm.
Kum 33 mi Ronaldo hi Real Madrid tana a season hnuhnung pahnihah kha chuan match zawng zawngah chhawr vek a ni tawh lo a, inkhel pawimawh bikah erawh mawhphurhna sang tak hlan a ni ṭhin thung. Massimiliano Allegri pawhin engtiang takin nge a enkawl chhoh dawn tih hi hriat a la ni chiah lo.
Juventus tan Ronaldo inlan thei mah se, hliam a tawrh bakah hrem tawk bawk Douglas Costa a inlan thei dawn lo a, ani bakah hian hliam tenau nei Sami Khedira, Mattia De Sciglio leh Andrea Barzagli te bakah hun rei tak chawl tawh Leonardo Spinazzola te chu an inkhel lo bawk ang.
Napoli lam
Season hmasa lama Juventus elphak ber chu Napoli an ni a, season kal laiah pawh anni pahnih hi an inthlur chho leh dawn tih a lang tawh. Carlo Ancelotti naute hian vawi khat chiah chak loh an la nei a, kai thar Parma lakah pawh harsa lutuk loin an chak mai tura ngaih a ni.
Manager tawnhriat ngah tawh tak Ancelotti chuan, "Juventus hian tun dinhmun an thlen theih nan hian hun rei ve tak chhung chu team din nan an hmang a, team nghet an neih hnuah an thawm ṭha reng bawk. Keini pawh kan indin nghet chho mek zel a, an thlen chin la thleng ve lo mah ila kan inthlau lo.
"Match nga khelh tawh chinah chuan in teh chi a ni rih lo, season tluana inkhel tur kan ni tih hriat reng a pawimawh ang. Kan thlen chin hi a chhe lo a, eng tiang chena thui nge kan kal theih tih chu a pawimawh lai a ni," tiin a sawi.
Zanin Inkhel Tur
Italy - Serie A
Udinese 10:30 PM Lazio
Atalanta 12:30 AM Torino
Cagliari 12:30 AM Sampdoria
Genoa 12:30 AM Chievo
Juventus 12:30 AM Bologna
Napoli 12:30 AM Parma
Roma 12:30 AM Frosinone