Srikanth a inhnukdawk

India nula badminton khel thiam Saina Nehwal leh Sameer Verma te chu Korea Open World Tour Super 500 tournament-ah an inlan dawn a, hetihlai hian Kidambi Srikanth erawh tun hnaia match a khelh hnem avangin a inlan dawn lo.

Kum 28 mi Saina hian tun thla tira khelh Japan Open a khel lo a, 18th Asian Games-a bronze a lak hnuah China Open chiah a la khel, mahse beisei ang result a nei lo - a match hmasa ber atan Korean nula Kim Hyo Min nen an inkhel ang.

Seeded pangana Saina hi tun dinhmunah world number 10 a ni mek a, ram tana a inlan­na Asian Games leh Commonwealth Games-ah khel ṭha viau mah se mimal inelna bikah result a la nei ṭha lo, atan fiahna hautak a ni dawn.

Mipa singles lamah Japan leh China Open khel zo hlim Srikanth-a'n chawlhkar hnih chhung a khelh avangin hahchawlh a duh a, Sameer Verma chu India tana medal la thei tura ngaih zingah a tel ang.

Kum 23 mi Sameer hi hliam vangin a buai ve fo a, kuminah erawh a khel chhe lo. February thla khan Swiss Open nomawi a chawi a, tun thlatir lam khan Hyderabad Open-ah a champion bawk avangin inrintawkna a nei sang ve hle tura ngaih a ni.