Bethlehem VT-in point an sual chhuak

Mc Dowell's No. 1 Soda Mizoram Premier League Season 7-a inlan club pariatin point an hmu kim ta. Nimin khan tlai inkhelah Chawnpui FC-in Vanlalthanga freekick hmangin first half-ah hma an hruai a, second half-ah Bethlehem Vengthlang FC-in C. Lalrintluanga hmangin an sut a, BVT-in point khat hlu tak an hlawh chhuak.

BVT rawlthar C. Tluanga tauh luh theihna tura siamsaktu Laldinliana Varte chu man of the match-a thlan a ni a, tun kar hian MPL round hnih a awm avangin coach H. Lalhlimpuia hote hian September 27 zan hian Electric Veng an hmachhawn ang a. Ningani tlai hian Chawnpui FC-in Chanmari FC an hmachhawn ve bawk ang.

Thanga freekick

Bethlehem coach Lalhlima'n keeper Lallawmzuala chungah rinna a nghat nawn a, amaherawhchu Lawma hian MPL khel turin inzirna tur a la ngah. Keeper tihsual vangin Chawnpui forward David Laltlansanga'n chance ṭha neiin hnai tak aṭangin a goal zawnah a pet lo a, amaherawhchu first half tawp hma hretin Hualngohmun tlangval Thanga'n yard 40 vel aṭangin freekick aṭangin a khung.

BVT goal nawr a fuh tawk loh avangin first half-ah Chhinga Veng aṭanga an lakluh Shalom Lala chu an luhtir a, second half ṭantirhah substitution hmang zoin keeper tawnhriat ngah zawk Eddie Zorammawia a luhtir bawk.

An ingam tawh

Second half-ah Chawnpui lam tan Thanga leh substitute Vanrammawia Ngente ten keeper Lalmalsawma chiah an hmachhawn hnuah an khung lo a. BVT lam pawhin point duh vanga 'risk' lain defence ngaihthahin an nawr ve bawk.

Minute 77-naah BVT-in siphurh an sut a, Dina Varte cross chu C. Tluanga'n a tauh goal. Chawnpuiin an hun ṭha neih an hman ṭangkai loh avangin BVT an phur thar a, team pahnih defence a pawp ve ve.

Tawnhriat nei ṭha Dina Varte-in a hun ṭha neih a hlah a, Chawnpui lamah a nau Lalramliana'n chakna goal a khung thei bik lo. Hun tawp thlengin an innawr a, chak leh chak lo thei dinhmuna ding ve ve khawpin tlarhnungin concentration an hloh a, goal erawh a luh belh tawh lo.