Intawnna hmasa: Liverpool vs Chelsea

Zanin dar 12:15-ah Liverpool chuan League Cup khel turin Chelsea an mikhual dawn a, tun kar chhunga team pahnih intawnna hmasa zawk tur a ni - Inrinni zanah Premier League khel turin an intawng leh dawn!

Tun season-ah Liverpool-in hneh loh an la nei miah lo a, Chelsea hi West Ham nena inhnehtawk hlim an ni thung. Liverpool-in an chak tluang lai tihtawp an duh dawn lo a, Blues-in Reds aṭanga bul ṭan ṭhat leh an tum thung ang.

Chelsea coach Maurizio Sarri-a'n, "Liverpool 'level' phak tur chuan kum khat tal kan la mamawh ang," tiin thiam takin 'pressure' lak kian tum mah se English football-ah 'inngaihthiamna' a awm ngai lo tih hrechiangtu chu fans an ni - zanin inkhel boruak a sang ang.

Sarri leh pressure

Liverpool-in season duhawm tak an hmang a, match sarih an khelh tawhah an la chak vek. Sarri-a'n a hmaa hna inchhawp a hai lo a, Liverpool nen an inkhelah pressure a awm loh nan thiam takin a inṭawng khalh lawk.

Italian manager chuan, "Liverpool hi chu coach pangngai hnuaia kum li chhung khel tawh an ni," a ti a, Jurgen Klopp-a'n ani aia a team hrechiang tura hun a ngah zawk thu a sawi a, "Ka ngaihdanah chuan Liverpool hi kan chung en tur an ni," a ti zui.

Klopp hian October 2015 khan Liverpool hi a enkawl ṭan a, League Cup, Europa League leh Champions League final te a khelhpui vek tawh a, nomawi chawi erawh a la nei lo.

Sarri-a'n tun season-ah Napoli chhuahsanin Chelsea a enkawl ṭan thung a, World Cup kum a lo nih bawk avangin Russia-a inkhel player-ten squad an zawm tlai a, Blues-a a player-te nen inhrechiang turin hun a la ngah tawk loah a inngai.

Kum khat hnuah...

Season ṭantir chauh a la ni a, vung taka Liverpool chanchin sawi tur pawhin a la hma 'mah mah' niin a lang. Sarri erawhin Liverpool a dah sang 'lui' a, tun kar chhunga an vawi hnih intawn tur a ngaihtuah tih a chiang.

Napoli boss hlui chuan, "Ka squad pumpui nena kan thawhho tak tak chu ni 35 emaw ni 40 chhung vel chauh kha a la ni a, kan tan chuan engkim hi a la hma rih em em vek a ni. Theihtawp chhuaha hna kan thawh chhunzawm zel a ṭul a, chutianga kan tih chuan kum khat hnuah chuan Liverpool kan tluk ve mahna," a ti!

Sir Alex Ferguson leh Arsene Wenger inhal vanglai aṭang tawhin 'thluak game' hmangin manager an inbei ṭhin a, Sarri hian a 'thluak' hmangin game a lo khel lawk a ni ber a, hei tak hian inkhel boruak san tur zia a pholang.

Chelsea hian tun season-ah league match vawi ruk khel tawhin an la tlawm miah lo a, Europa League-a an match hmasa berah an chak bawk - Sarri-a'n la inhrechiang tawk lo anga a insawi pawm a harsa!

Engtin maw?

Team pahnih hi kartawp Premier League-a intawng leh tur an nih avangin player thlan danah an fimkhur a rinawm sa a, Stamford Brdige-a an intawn tur hi season tawpa champion tur hriltu tur thlengin a ni thei - zanin ngaihthah a thiang tihna erawh a ni lo.

Chelsea tan Antonio Rudiger leh Pedro chu inlan thei lo chiang tura ngaih an ni. Sarri chuan, "Rudiger hi ni li tal a chawlh a ngai ang," tiin a sawi a, Pedro chu, "Kar tawpah a dam hman kan beisei," tiin a sawi chauh bawk.

Eden Hazard-a'n Hammers lakah minute 90 a khelh avangin Sarri-a'n chawlh hahdamtir a thlangin a rinawm a, a striker pahnih Olivier Giroud leh Alvaro Morata zingah tu zawk nge a chhawr dawn hriatthiam a harsa.

Spanish midfielder Cesc Fabregas hmel kan hmu leh tawhin a rinawm a, Ruben Loftus-Cheek leh Ethan Ampadu ten Anfield-ah khelmual an lut a nih pawhin a mak lo ang.

Liverpool ve thung...

Jurgen Klopp-a'n tlarhmaah Mohamed Salah, Sadio Mane leh Roberto Firmino a nei a, a player pathumte hi hliam vang a nih loh chuan a thlak zen zen lo - tunah erawh Chelsea nen a zawna an inhmachhawn dawn avangin a insiksawi a rinawm.

Champions League-a goal a khung hnuah Daniel Sturridge tan starting XI beisei a ngam awm a, Chelsea hrechiangtu striker hian a club hlui lakah goal khung ngei a duh ang.

Southampton laka khel ṭha em em mai Xherdan Shaqiri tan Liverpool starting XI-ah hmun a awm leh ngeiin a rinawm bawk - Saints an hnehna inkhela goal hnih kha a thawhchhuah a ni.

Naby Keita leh Fabinho te midfield-ah inkawp tura rin an ni a, tlarhnung lamah Virgil van Dijk chu chawl tura ngaih a ni. Dutch defender hi Saints lakah hliam vanga lakchhuah a ni a, ngaihtuahawm ni lo mah se 'risk' lakna tur chi niin a lang lo - Simon Mignolet, Nathaniel Clyne, Joel Matip leh Alberto Moreno te chu inlan tura beisei an ni bawk.