Konta leh Stephens chak lo nghal

Europe leh US lamah tennis season an hmang zo thawkhat a, Asia lamah inelna neih mek a ni. Wuhan Open khelh mekah Johanna Konta leh Sloane Stephens te chu hneh nei loin an tla nghal.

Thawhṭanni zan China-a inkhelah British number 1 Konta chu darkar khat leh minute 40 chhungin Ashleigh Barty lakah 7-5, 6-4 in a tlawm. Australian nula hian June thla khan Nature Valley Open-ah Konta hnehin nomawi a lo chawi tawh bawk.

June thla hnu lamah Kona hian match 18 khel leh tawhin vawi riat chiah hnehna a chang a, heng zingah hian Wombledon leh US Open aṭanga hma taka a tlak pawh a tel.

Player langsar dang inlan zingah Sloane Stephens chu Anett Kontaveit lakah 4-6, 7-5, 6-4 in a chak lo. Naomi Osaka erawh US Open hnuah Japan lama inelna dang a hmachhawn leh tawh avangin China-ah hian a inlan dawn lo, hming pe lut tawh mah se a inhnukdawk.

Grand Slam vawi hnih champion tawh Garbine Muguruza chuan Wimbledon-a a ngam loh Alison Van Uytvanck lakah phuba a la. Spain nula hian second round inhlangkai turin 6-4, 6-0 in hnehna a chang a ni.

American nula Madison Keys leh Olympic champion Monica Puig te chuan first round an paltlang vek a, world number 1 Simona Halep leh Caroline Wozniacki te erawh an bye avangin second round lut sa an ni thung.