A pu hlui ngamtu Super Frankie ; Man United buai a zual zel
Chelsea legend Frank Lampard chuan Thawhlehni zan khan Stamford Bridge-a a pu hlui Jose Mourinho a ngam a, a club enkawl Derby County chuan League Cup aṭangin United an pet chhuak.
Thawhlehni zan khan League Cup third round-ah team pahnih an intawng a, hun pangngaiah goal hnih ve ve khunga an inhnehtawk avangin penalty hmanga chak zawk zawn a ni.
Vawi 15 zet penalty chhuih luh a nih hnuah Rams goalkeeper Scott Carson chuan Phil Jones-a penalty pet a dang a, Old Trafford-ah United an mualpho a, Championship club-in 8-2 in hnehna an chang.
Team huaisen
Manchester United-in minute kuana lekah Juan Mata hmangin goal hmahruai an khung a, mahni muala khel an nih bawk avangin awlsam taka chak tur angin an lang hman–mahse Derby-in ngaihdan dang an nei thung.
Liverpool aṭanga Derby-a loan-a khel Harry Wilson chuan freekick hmangin mawi zetin si phurh sutna goal a khung a, United an chet chhiat chhunzawm.
Red Devils goalkeeper Sergio Romero chu a line pela tlan chhuaka a kuta ball a khawih avangin red card pek a ni a, Derby-in tam zawk an nihna chhawr ṭangkaiin Jack Marriott hmangin hun tawp nan minute nga chauh a awm tawh tihah goal an khung.
A tawk lo
Old Trafford-ah United an tlawm dawn niin a lang hman a, mahse an mualpho tur chhan turin Marouane Fellaini a rawn lang–Belgium midfielder hian hun pek belhah si phurh sutna goal a khung.
Extra time khelh a ni lo a, penalty hmangin chak zawk zawn nghal a ni–midang zawngin an pet goal laiin Phil Jones chu a pet goal lo awmchhun a ni a, United chhan nan injury time-a Fellaini goal khung a tawk lo.
Derby manager Frank Lampard chuan, "Mak ka ti hial zawk a ni. Old Trafford-ah hma taka goal chhuah hnua chak leh hi thil awlsam a ni lo," tiin a naute khelh dana a lawm thu a sawi.
Kan thiamloh a ni
Manchester United manager Jose Mourinho chuan game 'thih' tir theihna remchang an neih an chhawr loh avanga chak lo an nih thu a sawi a, chhuanlam a siam tam lo.
Portuguese manager chuan, "Goal khungna remchang kan neihah kan khung lo a, first half-ah khan game kha thih tir thei kan ni a, mahse kan ti si lo.
"Carabao Cup hi inelna lian lo tak a ni a, mahse tunah chuan minti buai dawn ta lo. A pawimawh ber erawh chak kan duh a, kan tih theih loh avangin kan hnual em em a ni," a ti.
United an buai?
Tun hnaiah Paul Pogba chuan Manchester United khelh dan a sawisel a, attacking game khelh a duh thu a sawi. France midfielder hian Derby a hmachhawn lo a, Luke Shaw, Victor Lindelof, Antonio Valencia leh David de Gea ten an hmachhawn bik lo tih erawh hriat tel a ṭha.
Jose Mourinho hian Pogba hi a thusawi avangin captain a nih ngai tawh loh tur thu a hrilh niin an sawi a, Mourinho a insawifiah. Portuguese manager chuan, "Pogba hi vice captain a nihna ka hlihsak a, manager ka nihna angin chu thutlukna chu ka siam thei a ni.
"Kan pahnih inkarah inhmuh thiam lohna engmah a awm lo a, in hnena sawifiah kher ṭul lo thutlukna ka siam a ni mai," tiin Pogba nen an inkar a ṭhat thu a sawi.
Inkhel Result
Burton Albion 2–1 Burnley
Wycombe Wanderers 3–4 Norwich City
Oxford United 0–3 Manchester City
Millwall 1–3 Fulham
Bournemouth 3–2 Blackburn Rovers
Preston North End 2–2 Middlesbrough
Penalty-ah 4-3 in Boro an chak
Wolverhampton 0–0 Leicester City
Penalty-ah 3-1 in Leicester an chak
Blackpool 2–0 Queens Park Rangers
West Brom 0–3 Crystal Palace
Manchester United 2–2 Derby County
Penalty-ah 8-7 in Derby an chak