Electric Vengin Chanmari FC an SHOCK

Mc Dowell's No. 1 Soda Mizoram Premier League Season 7-ah Electric Veng FC-in club lian leh champion rinkai an hneh chho kauh kauh a, MPL vawi hnih champion tawh Chanmari FC chu 'electric shock' hnuhnung ber an ni.

Thawhlehni zan Lammual inkhel hmuhnawm takah Electric Veng tan substitute Isak Vanlalpeka'n goal hnih a khung a. Chanmari tan rawlthar duhawm Lalnunzama'n siphurh sut ṭhen mah se MPL club thar tan David Lalchhuanawma'n chak nemnghehna leh pianchampha lawmna goal a khung a, EFC 3-1 in an chak.

Bul ṭan fuh!

Electric Vengin MFA Super Cup khel turin team an din hman lo, MPL 'point box' tura ngaitu an tam a nih pawhin dem theih an ni lo. Amaherawhchu football ngaina vengah chuan football kalhmang hria an awm a, an inpeih hmaa MFA Super Cup khel lo tura thutlukna an siam ngam chuan rah ṭha a thlen ta zawk.

I Day Football-ah Electric Veng an inlan ta a, Aizawl FC hnehin bul an ṭan. MPL club thar hian team ṭha rual zingah semifinal hial an thleng a, khelmual chungah bul an ṭan fuh ringawt a ni lo a, veng mipui ṭawiawmna ṭha avangin nasa takin an phur bawk.

Electric Shock

MPL an ṭan a, Aizawl FC coach Gift Raikhan chuan, "I Day Football-ah kha chuan Electric Veng kha tu nge an nih kan hre lo a. Tunah chuan kan hre tawh a, kan fimkhur dawn," tiin Vanglaini a hrilh. Amaherawhchu I League club hian inring leh kim ṭhap chungin 'electric shock' an tawng nawn.

Mizoram Police pawhin Aizawl FC hnung an zui a, tualchhung club ṭha hian Electric Veng zuam sualin 'electric shock' an pumpelh bik lo. EFC-in club ṭha pahnih an hneh hnuah an inthlahdul a, Chawnpui nen goal awm loin an inhnehtawk a, mumang ram aṭangin ben harh an ni.

Chanmari nen...

Electric Vengin hliam vangin captain C. Laldinmawia an chhawr thei lo a, player pawimawh Isak Vanlalpeka bench-ah an dah bawk. Chanmari lamin first half an thunun a, amaherawhchu Zama bakah Thomas Lalengkima leh Vanlalbiaa Chhangte ten an hun ṭha neih an bawh pelh.

EFC-in an chak lohna an hre hma a, minute 25-na lekah Isaka an luhtir a, substitute awmze nei hian inkhel a ti danglam.

Electric a êng

First half tawp hma hretin Aizawl FC laka freekick aṭanga goal ropui khungtu Isak-a'n freekick aṭangin Electric Veng hmahruaina goal a khung a, halftime a ni zui bawk.

Second half minute 68-naah red card hmuh avanga hremna hmang zo hlim C. Lalrosanga'n EFC defender khel ṭha Vanlalremruata a nghawk luih avangin yellow card vawi hnihna a hmu a, MPL7-ah a vawi hnih nan hnawhchhuah a ni.

Rosanga awm loh hnuah Chanmari game a buai phah lo a, Lalruatliana Sailo hoten game nung tak khel mah se EFC tlarhnunga Remruata leh Rorelliana te inkawp an khawng tlat. Right back C. Lalnunmawia'n season liam ta top scorer Laldampuia a dah ṭhat hnuah a thlaktu Lalmuanzova a dah bo leh bawk.

Minute 72-naah midfielder khel ṭha Vanlalremkima (Tetea) freekick chu Isak-a'n chiang zetin a tlawh lut a, 2-0 na chiah a ni. Chanmariin beiseina an neih theih nan minute 86-naah C. Muana ball vawrhluh chu defender-ten tauh chhuak mah se rawlthar duhawm Zama'n a pet goal. Chanmari rawlthar hian MPL match liah goal li a khung ta.

Inkhel tawp lam boruak a sang a, injury time minute ruknaah Salem Veng tlangval David-a'n mawi zetin a club hlui Chanmari keeper MS Dawngliana a pet khum a, defender tiha hriat ṭhin hian a hna thar striker chu hming chher nan a hmang chho mek.

An inphah hniam

Electric Veng manager Lalchhanhima chuan, "Team ṭha pathum an squad thlir pawhin keini aia ṭha leh hming langsar hneh theih chu a nuam dangdai khawp mai. Kan vannei a, kan inlungural a, kan ṭawngṭaina zar kan zo a ni ber e," tiin Vanglaini a hrilh.

Electric Veng 3–1 Chanmari FC
EFC : Isak Vanlalpeka 45+1', 72'; David Lalchhuanawma 90+6'
CFC : Lalnunzama 86'
MoM : Isak Vanlalpeka, EFC
46% Ball Possession 54%
9(4) Shots (On Target) 23(7)
0 Woodwork 0
1 Corners 3
2 Offsides 1
2 Yellow Card(s) 2
0 Red Card(s) 1