Kan ṭan mar pat a ngai - Chanmari coach

Chanmari FC-in MPL club thar Electric Veng an hneh loh hnuah vawiin tlai dar 3:00 hian Chawnpui FC an hmachhawn dawn a, MPL club thar a zawna hneh loh an tum lo.

Chanmari coach Lalruatliana Sailo (Tawia) chuan, "Electric Veng nen khan kan khel ṭha em em a, mahse goal kan khung thei lo. Football-in a ken tel a nih miau avangin kan pawm mai a ṭul. Chutihrualin insiamṭhat ngei a ṭul a, MPL club zawng zawng hi chetsual theihna vek a nih avangin ṭan mar pat a ṭul," tiin Vanglaini a hrilh.

MPL vawi hnih champion tawh Chanmari hian hrem vangin defender C. Lalrosanga an chhawr thei dawn lo a, coach Tawia'n a thlakna turah rawlthar duhawm Lalmuanawma (Munez-a) bakah midfielder Rochhingpuia leh KC.Larchhuakmawia te chu pawh let theih an nih thu a sawi bawk.

Chawnpui lam hian match liah chak hmel la hmu lo mah se vawi khat chiah an la chak lo a, Chanmari tan chak tur chiang saa indah a rem lo. Hei bakah hian Electric Veng laka Chanmari buaina ang thoin Chawnpui hian freekick specialist an kawl a, Hualnghohmun tlangval Vanlalthanga'n freekick aṭangin vawi hnih a khung.