Electric Vengin semifinal an hnaih

Zanin dar 7:00 hian Electric Vengin Lammualah Bethlehem Vengthlang an hmachhawn dawn a, MPL club thar hian match li leka point 10 an hmuh theih avangin semifinal kawng a inhawng zau ta hle.

MPL semifinal lut pha tur hian point 17 a tawk niin sawi ṭhin a ni a, amaherawhchu season liam ta khan palina leh pangana ten point 19 ve ve an hmu. Electric Veng hian zanina chak la nei lo BVT an hneh thei a nih chuan point 13 an hmu chho dawn tihna a ni a, match khelh tur a la tam bawk avangin MPL club thar hian semifinal an thleng ta lo a nih chuan an lawm tawh lo zawk ang.

Electric Veng mipui tan chuan zanin hi Lammual pan zan a ni a, point thum hmu tura inngaih erawh a la rem lo. Aizawl FC, Mizoram Police leh Chanmari FC hneh theitu ni mah se EFC hi Chawnpui FC nena an inhnehtawk tih theihnghilh loh a ṭha.

BVT tan erawh table mawngphah aṭanga tho chhuak turin chak ngei an mamawh tawh a, chak loh phei chu a thiang tawh lo. Coach H. Lalhlimpuia hoten attacking game an khel duh a nih pawhin tlarhnung ngaihthah a thiang tawh lo ang.

# Team Pld W D L GF GA GD Pts
1 Electric Veng FC 4 3 1 0 6 2 4 10
2 Chhinga Veng FC 3 3 0 0 5 2 3 9
3 Chanmari FC 4 2 1 1 7 6 1 7
4 Mizoram Police 4 2 0 2 7 5 2 6
5 Aizawl FC 3 1 1 1 6 5 1 4
6 Chawnpui FC 4 0 3 1 2 3 -1 3
7 Ramhlun North 4 0 1 3 3 10 -7 1
8 Bethlehem VT 4 0 1 3 3 6 -3 1