Bayern 100% chak titawptu Gotze

Augsburg defender Felix Gotze-a'n a club hlui Bayern Munich laka hun tawp dawna goal a khung hmangin German champion lakah a club chu 1-1 result a hlawhchhuahpui a, Bayern-in Niko Kovac kaih­hruaina hnuaia season bul an ṭan ṭhat chak vek record 100% an neih lai chu a tihtawp sak.

Bayern Munich hian match li an chak hnuah hnehna chang zo lo mah se point 13 hmuin hmahruaitu an ni tho a, khelh zat in angah Werder Bremen aiin point hnihin an sang zawk. Inkhel dangah Hoffenheim chuan 3-1 in Hannover an hneh a, he inkhelah hian English rawlthar Reiss Nelson chuan a vawi khat nan Bundesliga inkhel bul a ṭan a ni.

Bayern an chelh

Thawhleni zan Allianz Arena-a inkhelah Kovac-a'n Schalke hnehtu player panga siksawi mah se, a player neih ṭhat a chhawr tho. A tir lamah inkhel thunun nghalin Renato Sanches chuan hn ṭha hmasa ber hlahin goal pawn chiahah a pet chhuak.

Bayern tan Joshua Kimmich chu mual sirah a hmuhnawm a, a ball cross ṭha zet chu Sandro Wagner-a'n a tauh luh loh bakah Sanches bawkin goal bar chungah a thlawh chhuak nawn.

Goal lut loin chawlhlawk an hmang a, second half minute thumna lekah Arjen Robben a inlar. Dutch forward hian tun hma lam a tih fo tawh angin a kangin a pet kual lut a, Augsburg keeper Andreas Luthe tan dan hman a ni lo, si khat faiin hma an hruai.

German champion tan Rob­ben-a'n an khelmuala a match hnuhnung pathumah goal a khung leh ta vek a, goal hma­hruai a khung hnuah pawh chan loha awm Sanches tan hun ṭha a siamsak. Mahse, Portuguese player tan zan ṭha a ni lo - goal zawnah a pet thei lo.

Bench aṭanga luhtir Franck Ribery chuan goal khung mah se offside vanga pawm a ni lo, an mualah point thum an hlawh chhuak ngei dawn niin a lang hman. Mahse, hun tawp hma minute li chauh a awm tawh tihin Augsburg lamin corner an hmu.

Corner aṭanga ball rawn kal hi Bayern player ten an tauh chhuak lo a, leia a tlak hnuah pawh pet chhuak hman an awm lo. Bayern keeper Manuel Neuer-a tihsual nangchingin Felix Gotze chuan a su goal a, goal dung luh belhna hun a awm tawh loh avangin point khat ve ve an insem.

Kovac a lungawi lo

Bayern Munich manager Niko Kovac-a'n tun hma lama club in record a lo siam tawh vawi riat chak zawn nih rual chu an tum ber a nih loh thu a sawi tawh a, mahse tun ṭuma hun ṭha tam tak an khawhral erawh hriat­thiam harsa a tih thu a sawi.

Carlo Ancelotti kaihhruaina hnuaiah Bayern hian 2016-17 season khan a tir lamah match riat an chak zawn a, hei hi season bul an ṭan fuh ber ṭum niin Pep Guardiola khan a nih rual bawk. Kovac hian vawi sarih a chak zawn pui a, Augsburg hi hneh se kar tawp an chak zui leh a nih chuan record thar siam thei dinhmunah an ding hman a ni.

Kum 46 mi Kovac chuan, "Bundesliga-ah chuan 1-0 chauh a hmahruai hi chu engtiklai mahin a him ngai lo, Augsburg khan minute 90 chhung chu an khel ṭha takzet zet a, kan goal nawr tur tam tak kha hma takin min chhu chat thei a ni.

"Point thum hmu tura ngaih kan nih hnuah kan hmu ta lo a, hun ṭha kan khawhral zawng zawng kha kan ennawn a ngai ang. Kha aia tam zawk goal khung thei tur kha kan ni, goal sira kal liam kha a tam mah mah," tiin a sawi.

Khualmuala point khat hlawh chhuak Manuel Baum erawh a lawm. Augsburg coach chuan, "Allianz Arena aṭanga point khat hawn theih hi engtiklai mahin a chhe ngai lo, he hmuna kan inkhel a nih chuan rilru zawng zawng bakah tlem belh a ngai a ni," a ti.