Halep leh Kerber an tla
Wuhan Open khelh mekah beisei loh result lian tak kan hmu nghal. World number 1 Simona Halep chu Dominika Cibulkova hneh loin a tla a, number 3 Angelique Kerber pawh hneh nei loin a zingkawng a tawp nghal.
Thawhlehni zan inkhelah Halep hi 6-0, 7-5 in a chak lo. Romanian nula hian French Open nomawi a chawi hnuah beisei ang result a nei thei rih lo, China-a hard court tournamet-ah hian seeded pakhatna niin round hmasa ber chu bye tir a ni.
Tun hma lama an khelh tawh dan thlir chuan harsa lutuk loin Halep hi chak tura ngaih a ni. Mahse, set hmasa zawkah game a la miah lo a, set hnuhnung zawkah a khingpui service vawi thum chhuhsak thei mah se a service chu vawi li ngawt a hloh avangin a tan kawng a inhawng lo.
Season tawpa a ṭha zual pariat ten an khelh tur WTA Finals atan Halep hi a tling chiang tawh a, chutihrualin tunlaia a khelh dan thlir chuan Singapore khawpuiah hlawhtlinna a chan a beisei awm rih lo hle.
Inkhel dangah world number 3 Kerber chu Ashleigh Barty lakah 7-5, 6-1 in a tlawm. Grand Slam vawi thum champion tawh Kerber hian a service hmasa chu 46% chauh a ti dik a, a ball vuak fuh theih loh ṭum tawngin double faults pawh vawi ruk ngawt a nei.
Australian nula Barty tan China hi inkhelh nawmna hmun a ni ve thung, season hmasa finalist chuan, "Khawvela player ṭha berte zinga mi a ni a, ani nen a inkhelh hi chu a awlsam ngai lo. He hmunah hian nuam ti taka inkhel turin ka kal a, hlauhthawnna nei loin ka khelh avangin a nuam hle," a ti.
Batry hian quarterfinal-ah chuan Petra Kvitova leh Anastasia Pavlyuchenkova te inkhela a chak zawk a hmachhawn leh ang a, Halep hnehtu Cibulkova hian Daria Kasatkina a hmachhawn ve leh thung ang.