Saina-i'n last 16 a lut

Badminton world number 1 hlui Saina Nehwal chuan nimin khan Korea Open-ah a match hmasa ber a khel a, India nula hian 21-12, 21-11 in khawtual nula Kim Hyo Min hnehin last 16 a lut - Saina hi first round-ah a bye a ni.

Kum 28 mi Saina hian game hmasa zawk aṭangin inkhel a thunun hneh hle a, fal takin hma a hruai thei reng. Game hnihna bikah pawh 11-6 ngawt a fal nghalin a tawp thlengin a buai lo.

Inkhel dangah India tlangval Ajay Jayaram chuan Seoul khawpuiah main draw a in vaw kai zo lo a, qualifier-ah a zinkawng a tawp. Jayaram hi Chinese shuttler Zhao Junpeng lakah 26-24, 21-18 in a chak lo a ni.

Young Vaidehi Chou­dhari pawhin beiseina sang tak nen Korea pan mah se, khawtual player Kim Ga Eun chu 21-8, 21-8 in a ngam lo a; Mugdha Agrey pawh world number 1 hlui LI Xuerui lakah 21-8, 21-8, in a tlawm bawk.