Police-in Ramhlun North an sawp
Mc Dowell's No. 1 Soda Mizoram Premier League Season 7-ah Mizoram Police-in match hnih chak hmel an hmuh loh hnuin nimin tlai khan Ramhlun North 5-1 in an sawp. MPL champion tuma sum seng tam Ramhlun North hian match li an khelh tawh aṭangin point khat chiah an la hlawh chhuak a, club secretary Lalenghluna (Maenga) chuan coaching staff an insiksawi tur thu Vanglaini a hrilh.
Mizoram Police tan hian man of the match atana thlan F. Lalrinpuia'n goal hnih a khung bakah Lalbiakhlua, Lalramtharmawia leh Lalfakzuala ten goal khat ṭheuh an khung a, scoreline lan mawi nan goal nga an chhuah hnuah Ramhlun North striker Waheed Adekunle chuan goal khat a khung ve bawk.
Tawnhriat nei an dang
Ramhlun North tlarhnungah Joseph Lalnunpuia inlan thei mah se Lalramfelpuia chu inhliam vangin an chhawr thei lo. Police tlarhnungah Lalrinzuala Khiangte a inlan a, Aizawl FC defender hlui awm hian tlarhnung tiphui vek lo mah se inrintawkna an siam phah hle.
Police-in bul an ṭan ṭha a, Fakzuala'n hnai tak aṭangin a hlah nachungin goal an khung hmasa tho a. Minute 21-naah Republic Veng tlangval Valpuia chuan Ramhlun North keeper Liansangpuia tihsual nangching goal hmahruai a khung. Ramhlun North tlarhnung an insiamṭha thei lo a, minute 27-naah V. Lalṭanpuia vawrh luh chu Biaktea'n cool takin keeper pet khum nan a hmang.
Ramhlun North-in goal chance ṭhahnem tak an nei ve tho a, Laldingngheta'n keeper chauh a hmachhawn hnuah a khung thei lo a, Nigerian stiker Waheed pawhin chance ṭum thum ṭha a neihah crossbar vawi khat a pet per chu a goal khung teuh ber a ni.
Second half-ah Ramhlun North-in goal khung tumin Lalliansanga (Notea) an luhtir a, amaherawhchu minute 57-naah Police forward Valpuia'n a tauh goal leh avangin thawhchhuah a harsa tawh. Police tan Hualngohmun tlangval Mamawitea'n mawi zetin box pawn aṭangin minute 72-naah a khung a, Fakzuala'n minute 84-naah goal ngana a khung leh bawk.
Ramhlun North-in beisei tur an neih loh hnuah Waheed hmangin minute 86-naah an khung a, Police tlarhnung a phui bik lo tih lanna ṭha tak a nih avangin coach Lalbiaksanga Colney hote tan inenfiahna ṭha tak a ni thei ang.
Engtin zel?
Mizoram Police hmachhawn leh tur chu champion lai Chhinga Veng a ni dawn a, Zirtawp tlai hian an inkhel leh nghal dawn. Ramhlun North-in Zirtawp zanah I League club Aizawl FC an hmachhawn nghal dawn a, MPL7-ah a vawi khat nan point thum hmuh an tum a nih chuan hmabak a hautak khawp ang.
Ramhlun North secretary Maenga chuan, "Kan club hian sponsor ṭha tak kan nei a, sum pawh kan seng nasa. Kan player en hian hetiang ngawt tur a ni lo a, club ṭhatna turin hma kan la ang," tiin Vanglaini a hrilh.
Ramhlun North 1 - 5 Mizoram Police
RNFC : Waheed Adekunle 86'
MPFC : F. Lalrinpuia 21', 57'; Lalbiakhlua 27';
Lalramtharmawia 72'; Lalfakzuala 84'
MoM : F. Lalrinpuia, MPFC
54% Ball Possession 46%
13(5) Shots (On Target) 17(10)
1 Woodwork 0
3 Corners 1
4 Offsides 2
0 Yellow Card(s) 1
0 Red Card(s) 0