Kan la him lo - Wolff

Tun season chhungin Formula 1 intlansiak vawi ruk chiah a awm tawh dawn a, tun kar tawp hian Russian Grand Prix tlan a ni ang. Diver leh team champiohsip lama hmahruaitu Mecedes erawh an ngaih a la ṭha lo, team hotupa Toto Wolff chuan an la him loh thu a sawi.

Diver lama hmahruaitu Lewis Hamilton-a'n tun hnai intlansiak panga zinga paliah hnehna a chang thei a, point 40 zetin hma a hruai fal tawh. Britain tlangval hnungah hian Sebastian Vettel leh Kimi Raikkonen te an awm.

Team championship lamah pawh Mercedes hian an elpui ber Ferrari aiin point 37 zetin hma an hruia fal tawh, a lan dan chuan an dinhmun hi a him hle. Mahse, intlansiak pakhata hnehna chang tuin point 25 a hmu thei a, hei vang hian boruak a la inthlak danglam thei hle thung.

Silver Arrows chief Toto Wolff chuan, "Tun ang dinhmuna hmahruaitu nih chu thil ṭha tak a ni a, chutihrualin intlansiak vawi ruk awm turah hian point hmuh belh theih a la tam hle tih kan hriat a ṭha. Inelna kan hmachhawn apiangah rilru leh tih takzetin kan bei chhunzawm ang, a pawimawh ber chu kan rilru put hmang hi a ni," tiin a sawi.