Aizawl FC-in Chhinga Veng chak tluang titawp
MFA hnuaia inelna lian zawng zawng champion lai Chhinga Veng chu match 15 an chak zawn hnuah Nilaini zan khan Aizawl FC nen goal awm loin an inhnehtawk.
Mizo club zinga I League khel thei awm chhun chu Aizawl FC ni mah se tualchhung football erawh season liam ta aṭangin Chhingcows-in ro an rel a, Nilai zanah pawh hian chak phu zawk an ni.
An duh chu nomawi
Season liam ta khan khan Chhinga Veng chu vawi 14 an chak zawn a, an record duhawm tak hi Aizawl FC-in an tihtawp sak. Kumina an inhmachhawn hma hian Chhingcows hi vawi 15 an chak zawn tawh a, I League club thoin an chak tluan an tihtawp sak.
Amaherawhchu, Aizawl FC tan Chhinga Veng record an tihtawp sak avang chauha an lawm a nih chuan inenfiahna tur tam tak a awm ang. Chhingcows boss Lalsangzuala Hmar chuan, "Record chu a hlu a, kan nomawi kalkawng an dal loh chuan pawi ka ti lo," tiin an duh chu nomawi a nih thu a sawi tawh a, Aizawl FC coach Gift Raikhan aiin tun dinhmunah nomawi duhin a tuihal zawk niin a lang.
Chhandamtu Gurpreet
Chhinga Vengin player che rang rual an luhtir a, midfield-ah Lalrinchhana leh Lalmuansanga te inkawpin mual sirha Lalrammawia leh hmabak êng F. Lalnuntluanga te an awm a, tlarhmaah Lalromawia leh MS Dawng-liana te an inkawp bawk.
Aizawl FC lamah defender Hmingthanmawia (Valpuia) dam tawhin Lalrinchhana Tochhawng nen an inkawp a, an foreigner neih chhun Alfred Kemah Jaryan chu tlarhnung puituah hmang loin goal nawr turin hmatawngah a awm a. MPL-a tawnhriat la ngah tawk lo K. Lahmangaihkima leh Paul Ramfangzauva te chu defence leh forward thlun zawmtu an ni.
I League club-in ball an chang tam zawk a, goal chance erawh Chhinga Vengin an ngah zawk. Chhingcows tan Lalromawia freekick pet chu keeper Gurpreet chuan ṭha zetin a dan sak a, Dempo keeper hlui hian Romawia bakha Rammawia, Dawngtea leh Muansanga te goal khung tur a dan sak vek.
Aizawl FC erawhin Chhinga Veng keeper Zothanmawia an tibuai pha lo a, Gurpreet erawh hun tawp thlengin a buai.
Hun tawp hma hretin Chhingcows-in chakna goal khung angah an inngai a, amaherawhchu referee Lalrawngbawla Hrahsel chuan ball-in goalline a pelh theih nan Vanlalalzuidika chu keeper Gurpreet lakah a foul-in a hmu thung.
Eng nge an sawi?
Aizawl FC coach Gift Raikhan chuan, "Chak tumin game plan kan siam a, kan tum hmasak ber chu goal chhuah loh a ni a, kan tihlawhtling. A pahnihna goal khung erawh kan ti hlawhtling thei lo. Chhinga Veng hi kan la tum leh dawn a, hneh ngei kan tum tawh ang," tiin point khat hmuh chu a duhkhawp loh thu a sawi.
Chhinga Veng coach Lalsangzuala Hmar chuan, "Goalkeeper aṭanga forward thlengin ka naute khelh danah ka lungawi hle. Goal chance ṭha tak tak kan insiam a, kan tlarhnung pawh a phui ṭha. Football-ah chuan vanduai ṭum chu a awm tur a ni," tiin chak phu zawk an nih thu a sawi.