Arsenal an kaltluang

Danny Welbeck-a goal hnih hmangin Arsenal chuan Championship club Brentford 3-1 a hnehin Carabao Cup fourth round an lut. Unai Emery nauten inelna hrang hrangah a zawnin match ruk chhung hnehna an chang ta.

Nilaini zan khan Emirates Stadium-ah Brentford an lenglut a, team ṭha zawk Gunners hi mahni muala khel an nih avangin chak tura rinkai sa pawh an ni. Welbeck-a'n goal hnih a khung hnuah Alan Judge hmangin sut ṭhen mah se, substitute Alexandre Lacazette chuan chak nemnghehna a khung leh a ni.

Emery-a'n Everton hnehtu player pakua ngawt a siksawi a, kum 18 mi Emile Smith Rowe chu a vawi khat nan inkhel bul ṭantir a ni. English rawlthar beiseiawm hian amah ringtu manager a ti thlawn lo - Henrikh Mkhitaryan leh Matteo Guendouzi te nena an thawhhona ṭha chuan an striker tan goal a hring chhuak.

Arsenal manager Emery chuan, "Ka naute khan minute 90 chhung inringtawk takin an khel a, hnehna chan hi kan tan a pawimawh. Player tin an khel ṭha a nih chuan goal chu a lut mai, nitin hma kan sawn zel a, kan theihna sang ber erawh kan la thleng lo deuh.

"Welbeck-a'n goal hnih khungin a team tan a thawhhlawk hle a, inkhel bul a ṭan chhan pawh training-na lama a tih ṭhat vang a ni. Mitin tan hmun a awm a, thawhrimna leh tih takzetna hi kan mawhmawh a ni zel," a ti. Emile Smith Rowe pawh Gunners academy chhuak a nih bakah, tun hnaia hma a sawn chak thu a sawi bawk.

Arsenal hian club te zawk lakah chak loh an nei khat hle, 1983 hnu lamah chuan EPL club aia hniam an mikhual lakah chak loh an la nei ngai lo a ni.

Spanish manager Emery hian England a pan tirah inkhel hautak a hmachhawn nghal. Premier League champion Manchester City leh Chelsea ngam lo mah se a zawnin league match li chhung hnehna an chang tawh, Inrinni zan hian anmahni mualah bawk Watford an hmachhawn leh ang.