Tlai dar 3:00-ah Police Vs Chhinga Veng

Mizoram Police-in match hnih a zawna an chak loh hnuah Ramhlun North 5-1 in an sawp a, vawiin tlai dar 3:00 hian Lalbiaksanga Colney hote hian tun season-a chak loh la tawng lo Chhinga Veng an hmachhawn dawn.

Mizoram chhunga football inelna sang ber MPL-ah Police an la champion ngai lo a, an match hnuhnung berah goal nga tehmeuh khung mah se champion lai Chhingcows lakah erawh chak tura rin hlawh lo zawk an ni ang.

Inhlau lo

Mizoram Police tlarhma chhuanvawr F. Lalrinpuia, Lalfakzuala leh Lalbiakhlua ten an match hnuhnung berah goal an khung vek a, Chhinga Veng tan chanchin hriat nuam a ni lo.

Amaherawhchu, Chhingcows coach Lalsangzuala Hmar chuan, "Aizawl FC theihna kan hria a, anni chu hneh duh mah ila goal venhim kawngah kan fimkhur a ṭul. Police lakah erawh goal nawr lamah rilru kan pe lehzual ang," tiin

Vanglaini a hrilh.

Attacking a ngaih pawimawh thu sawi nawnin Sanga chuan, "Police hian an match hnuhnung berah goal nga an khung a, kei ni erawhin goal kan khung lo. Goal hi a pawimawh ber a nih avangin goal khung thei tura kan insiamṭhat a ṭul dawn," a ti.

Engtin zel?

Police tlarhmaah hmasawnna awm mah se Ramhlun North an hneh ṭum hian an tlarhnung a la phui chuang lo a, Chhinga Veng lakah fiahin an awm dawn.

Coach Lalbiaksanga Colney chuan, "Kan dam ṭha a, inkhel turin kan inpeih. Hmasawnna hmuh tur a awm zel ang," tiin a sawi.

Police hian match li khelhah point ruk an hmu a, season bul ṭan ṭha tawk lo tiin sawi mah se Chhingcows an hneh chuan champion lai nen an inthlauhna hi point khat chauh a ni tawh ang.