Chanmari lakah Chawnpui an par
Mc Dowell's No. 1 Soda Mizoram Premier League Season 7-ah nimin tlai khan kai thar Chawnpui FC-in vawi hnih champion tawh Chanmari FC chu 3-1 in an hneh a, team hming enin 'result mak' tia sawi theih ni mah se minute 90 chhunga an khelh dan thlirin chak phu zawk an chak.
Chawnpui tan Vanlalthanga'n goal hnih a khung bakah David Latlansanga'n goal khat a khung ve bawk a, Chanmari goal awmchhun hi rawlthar duhawm Lalnunzama khung a ni.
Freekick bawk
Chanmari FC-in Electric Veng an hmachhawn ṭumin set piece dan an harsat a, an la insiam ṭha lo tih nimin tlai inkhelah a lang. Minute 19-na lekah Chawnpuiin ding lam kila an freekick hmuh chu Thanga'n a ke vei lamin mawi zetin a pet kual lut a, Chanmari keeper Lalruatpuia'n a dang thei lo.
Hualngohmun tlangval Thanga'n MPL ball thar Nivia Antrix hrethiam turin a hranpaa a inzir nasast thu Vanglaini a hrilh a tawh a, tun MPL-ah freekick aṭangin goal thum khung tawhin a tawhrim rah a lang chho zel. Goal luh hnu minute riatah Chawnpui forward David-a'n keeper pet chhuah sual chu hmang ṭangkaiin ṭha taka a lakluh hnuah Ruatpuia kap karah a thawlh nalh hle.
Chanmari-in goal hnih inkarah hian sutna hun ṭha an nei a, Chawnpui an vannei a tih theih rualin tlarhma lama awm Lalmuanzova, Vanlalbiaa Chhangte leh Zama te finishing a ṭha tawk lo. MPL kai tharin Chanmari goal nawr ta tak an paltlang hnuah an insiam rem a, first half-ah Lalruatfela (RF-a) freekick chuan crossbar a per leh a, goal-ah a lut tawh lo thung.
Chawnpui an fei
Chanmari FC-in insiamṭhat tumin first half-ah Jeremy Laldinpuia an luhtir a, second half-ah Bethlehem VT laka chakna goal khungtu Mark Zothanpuia leh nikum top scorer Laldampuia te luhtir a, an goal nawr na sawt mah se Chawnpui an ṭang thei hle.
Chawnpui defender Lalruatfela'n Chanmari forward Dampuia goal khung tur chu goalline aṭangin a dang. Minute 82-naah Chanmari beiseina siam turin Dampuia vawrhluh chu Zama'n a tauh lut a, Chamari rawlthar hian MPL match nga a khelh tawhah khung vekin goal nga a khung tawh a, top scorer a ni mek.
Tawia hoten beiseina thar an nei a, amaherawhchu hun tawpah Chawnpui zawk an ding chang. Injury time-ah Jerry F.Zonunsanga vawrh luh chu Thanga'n lalutin keeper Ruatpuia hmaah talbuai loin chak nemnghehna goal a khung.
Chak phu Chawnpui
Chawnpui FC coach Laldinthara chuan, "Kan khelh dan a lungawi thlak hle. Kan lamah goal lut mah se kan tlarhnung te an fak awm a, kan tlarhma lamte an khel ṭha tih chu goal-in an sawifiah. Minute 90 chhunga kan khelh dan thlirin point thum hmuh hi kan phu a ni," tiin a sawi.
MPL club thar hian Mizoram chhunga football inelna sang berah match nga an khel ta a, Chanmari FC hi hnehna an chan hmasa ber a ni a, hemi hma match liah hian vawi khat chak loin vawi thum dangah an inhnehtawk.
Thara chuan sawi chhunzawmin, "Chanmari kan hneh avangin semifinal sawi ngam chi kan ni lo. Keini tum hmasak ber chu relegate loh a ni," tiin a ṭawng huai duh lo.
1 Electric Veng FC 4 3 1 0 6 2 4 10
2 Chhinga Veng FC 4 3 1 0 5 2 3 10
3 Chanmari FC 5 2 1 2 8 9 -1 7
4 Mizoram Police 4 2 0 2 7 5 2 6
5 Chawnpui FC 5 1 3 1 5 4 1 6
6 Aizawl FC 4 1 2 1 6 5 1 5
7 Bethlehem VT 4 0 1 3 3 6 -3 1
8 Ramhlun North 4 0 1 3 3 10 -7 1