Indonesian league-ah fan a thi

Indonesia-a an football league sang ber Liga 1-ah buaina a chhuah avangin fan pakhat a thi a, Indonesia sorkar chuan kar hnih chhung he league hi khelh rih loh turin chawlh lailawk tir a nih tur thu an sawi bawk.

Pathianni khan club pahnih Persija Jakarta leh Persib Bandung te chu an inkhel a, Bandung khaw­puia inkhelah hian khelmual pawn lamah buaina chhuakin Persija fan, kum 23 mi Haringga Sirla chu a thi a ni.

Indonesia sports minister Imam Nahrawi chuan league chu kar hnih chhung atan chawlh lailawk tir a nih tur thu a puang nghal a, "Buaina hi kan chinfel vat chuan hma zawkah pawh league hi khelh leh a ni ang," tiin kar hnih chu chawlh ngei ngei tur tihna a nih loh thu a sawi.

Football watchdog Save Our Soccer-in a tarlan dan chuan Indo­nesia-ah football vanga fan an thih hi thil thar a ni tawh lo. Kum 2012 hnuah khan tun hi football fans intihbuai avanga thihna a thlen vawi sarihna chiah a ni - Haringga Sirla thih chungchangah hian mi 16 chu man an ni tawh.

FIFA chuan Indonesia hi kum 2014 aṭang khan international com­petition khel thei lo turin a lo hrem tawh a, mahse kum hnih hnuah he hremna hi a hlihsak.

Asian Games 2018 chu Indo­nesia hian hlawhtling takin an thleng zo hlim a ni a, 2032 Olympics thlen an tum leh der tawh - mahse tun hnai thil thleng hian an chance a ti chhe ve viau thei a ni.