Barca leh Real an tlawm - in duh thei an awm lo!
Spanish La Liga-ah Ningani zan khan beisei loh result a thleng a, Barcelona leh Real Madrid ten an khingpui an ngam lo ve ve - La Liga a ngaihnawm sawt dawn.
Barca chu an intawn hmaa table mawngphaha awm Leganes khelmualah an leng lut a, chak lo tura ngaih an ni lo - mah se second 68 chhung leka goal hnih an chhuah an tuar a, 1-2 in an tlawm.
Catalan club tlawm thu hre sain Real Madrid an inkhel a, an chak chuan league hmahruaitu an ni thei tih an hria. Mahse, European champion hian an hun ṭha neih an chhawr lo mai a ni lo a, Sevilla khelmualah 0-3 ngawtin an chak lo!
Beisei loh result
Leganes khelmualah Barcelona-in minute 12-na lekah Philippe Coutinho hmangin hmahruaina goal an khung a, Catalan club tan chak turin harsatna a awm dawn lo niin a lang. Mahse, Barca-in goal dang an khung leh tawh lo.
Nabil el Zhar chuan minute 52-naah si phurh sutna goal a khung a, Barca insiamṭhat fel hmain Oscar Rodriguez chuan goal hnihna a rawn khung zui - Leganes goal hnihna hi Gerard Pique tihsual vang a ni a, tum lo deuhin Oscar hi ball a pass!
Barca-in 1-0 a hma an hruai laiin Lionel Messi chuan woodwork pet per mah se goal hnih an chhuah hnuah erawh chak tur angin an lang tawh lo - an hun ṭha neih chhunah Philippe Coutinho leh Ivan Rakitic ten a zawn zata ṭha zeta an pet chu Ivan Cuellar chuan a dan sak.
Hriatthiam theih loh!
Kum 2017 nipui lai khan Ernesto Valverde-a'n Barcelona a pan a, tun hi Nou Camp-a pan hnua La Liga-a ṭum hnih a tlawmna chiah a ni - Nilaini zana an hneh loh team hian an intawn hmain match nga aṭangin point khat chiah an la hlawh chhuak!
Valverde chuan, "Hriatthiam theih loh result a ni. Chance insiam kan harsat em em a, tlarhnung lamah anni an inrem phui tlat thung si. Game harsa tak a ni a, he result hi kan beisei chu a ni lo," a ti.
Spanish manager chuan a eng zawngin thil a thlir zui a, "Kartawpah, keimahni khelmual ngeiah Athletic Bilbao ho kan mikhual dawn a, chumi atan chuan insiamṭhat kan ngai dawn a, kan vaia kan thawhho a ngai dawn a ni," tiin a sawi.
Real pawh chu...
Barca an tlawm a, Real tan tlanpelhna remchang a ni. Mahse, European champion-in an hun ṭha neih an chhawr lo a, Andre Silva an ngam lo - Milan aṭanga loan-a Sevilla pantu hian goal hnih a khung.
Portuguese striker hian minute 21 chhungin goal hnih a khung a, Wissam Ben Yedder chuan minute 39-naah an goal thumna a khung bawk - Franco Vazquez chuan bar a la pet per mah mah!
Real-in beisei an phak lo a, shot vawi 21 ngawt an nei chungin Sevilla hi an rum ṭhaih meuh lo a ni ber - Gareth Bale-a'n vawi khat post a pet per tih loh chu chance hlauhawma sawi tur a awm lo a, World Player of the Year Luka Modric goal khung chu VAR hmangin pawm a ni lo bawk.
Inkhel Result
Athletic Bilbao 0 - 3 Villarreal
Leganés 2 - 1 Barcelona
Valencia 1 - 1 Celta de Vigo
Sevilla 3 - 0 Real Madrid