Anfield-a Liverpool ngamtu Chelsea

Tun season chhunga la tlawm lo Liverpool chu a vawi khat nan an tlawm ve ta. Nilaini zan khan Chelsea chuan 'tuma la ngam loh' team hi Anfield-ah ngei 2-1 in an hneh a, League Cup aṭangin an pet chhuak.

Virgil van Dijk-a'n, "Nomawi pali chawi vek kan tum a ni," a tih chu a chil per pawh a la hul fel hmain thaichhiat a ni nghal a, Reds tan Carabao Cup-ah beisei tur a awm tawh lo.

Liverpool tan Daniel Sturridge chuan a club hlui lamah goal hmahruai khung mah se Blues hian Emerson Palmieri leh Eden Hazard hmangin an chhanglet a, a tawpah Chelsea an hlim zawk.

Team pahnih hi Inrinni zanah an intawng leh dawn a, Premier League a ni tawh thung ang - Stamford Bridge a ni tawh dawn bawk. Liverpool hmabak a hautak a, Chelsea erawh an inringtawk sawt ang.

Sturridge chu le

Daniel Sturridge-a'n Champions League-a inkhel bul a ṭanah goal hmahruai a khung tawh a, Chelsea lakah pawh a dam ṭhat phawt chuan goal khung a la thiam reng tih a pholang.

English striker hian minute 58-naah mawi zetin bicycle kick hmangin a pet lut a, Liverpool hma a hruaipui. Chelsea striker hlui hian first half-ah goalkeeper a bum vek hnuin a pet goal lo a, mahse a goal hian a tihsual hmasa erawh a khuh hneh hle.

Minute 79-na a ni a, Liverpool an chak dawn niin a lang tawh. Mahse, Chelsea-in Emerson hmangin an chhanglet a, offside-ah ngaih ni mah se video assistant referee (VAR) hmanga enfiah a nih hnuah pawm a ni.

Liverpool coach Jurgen Klopp chuan, "Ka ngaihdanah chuan offside ngei a ni a, chiang takin player pahnih chu an offside chiang a ni. Mahse, an ennawn thlap a, chuti chunga offside-a an ngai lo a nih chuan kan pawm mai a ngai a ni," a ti a, a lungawi lo.

Hazard goal ropui

Chelsea-in minute 56-naah Eden Hazard an luhtir a, hun tawp nan minute nga chiah a awm tawh tihin a danglamna a lantir. Belgian midfielder hian mual ding lam sirah ball a la phei a, a tlan luhpui.

Mawi zeta Alberto Moreno a bum hnuah Simon Mignolet tana dan rual lohin a pet lut a, player class sang bik lo tan khung chi a ni ve lo - Liverpool tan chhanletna hun a awm tawh lo a, Anfield-ah an tlawm.

Chelsea assistant manager Gianfranco Zola chuan, "Goal ropui bik a ni. A mawina piah lamah a goal khung hun khan kha goal kha a ti hlu lehzual a ni. Hazard hi Premier League-a ṭha ber pawl a ni satliah mai lo a, Europe leh khawvel huap pawhin a ṭha ber pawl a ni," a ti a, a duhthawh hle!

"Ka ngaihdanah chuan Hazard hi a ṭhat dan berin kan la hmu lo," a ti zui! Chelsea tan Alvaro Morata chuan chance duhawm vawi hnih ngawt a nei hman a, goal-ah erawh a chantir lo.

Thlir ila...Inrinni zan!

Chelsea-in hnehna chang mah se Hazard-a'n League Cup aia Premier League a ngaih pawimawh zawk thu a sawi. Goal ropui khungtu forward chuan, "Ni li liam ta maiah khan West Ham nen kan inhnehtawk a, he result hian inrintawkna min pe ngei ang.

"Inrinni zana Liverpool nena kan inkhel tur hi zanin aiin a pawimawh zawk a, Reds hneh ngei tum hian kan beih a ngai dawn a ni," tiin inkhel tur a thlir lawk.

Liverpool boss Jurgen Klopp chuan, "Chelsea khelh duh dan kan hre sa a, hmun awl kan pe hnem mah mah kha kan tuar a, khati chung khan first half-ah kha chuan chance kan ngah zawk.

"Inrinni zan atana inpuah-chahna ṭha tak a ni a, kha aia ṭha zawka tlarhnung remphui thei erawh kan ni," tiin chak loh chhanah defending ṭha lo chu a puh.

Inkhel Result
Arsenal 3 - 1 Brentford
West Ham 8 - 0 Macclesfield Town
Liverpool 1 - 2 Chelsea
Nottingham Forest 3 - 2 Stoke City
Tottenham Hotspur 2 - 2 Watford
Penalty-ah 4-2 in Spurs an chak