Chelsea hneh tum Jurgen Klopp

Liverpool boss Jurgen Klopp chuan, "Kan bei let dawn a, hneh kan tum dawn. Chu chu sports kalphung pawh a ni," tiin a sawi a, Chelsea hneh a tum.

Zanin dar 10:00 hian Chelsea chuan Liverpool an mikhual dawn a, team pahnih inkhel tur hian ngaihven a hlawh hle - Nilaini zan khan League Cup-ah team pahnih an intawng tawh a, 2-1 in Chelsea an chak.

Liverpool hian Chelsea an tawn hmain tun season-ah an la tlawm miah lo a, mahse Anfield-ah Blues an ngam loh avangin League Cup aṭanga petchhuah an ni.

Premier League-ah erawh Liverpool-in hma an la hruai reng a, match ruk chhung an khingpui an la hneh vek - he kaltluang lai titawp thei tur an awm a nih chuan Chelsea bawk hi theihna neitu an ni a, zanin inkhel a hmuhnawm dawn.

Theihtawp chhuahin...
Liverpool-in League Cup-ah Chelsea an ngam lo ngei a, mahse hei hi Premier League-a an inkhel tur teh nan chuan a tling lo mai thei. Team pahnih hian an starting XI pangngai an hmang lo ve ve a, zaninah erawh an ṭhat dan berin an khel ang.

Liverpool coach Jurgen Klopp chuan, "Chelsea hian kan intawn hmasaka player an hmang tawh lo ang a, thil tam tak a inthlak danglam dawn. Mahse, he inkhel tur atan hian ka phur takzet a, intawn hlan ka nghakhlel a ni," a ti.

Klopp chuan, "Chelsea khelmualah kan kal dawn a, ṭum dang ang bawkin kan theihna zawng zawng kan pe leh ang. Intawn hmasaka kan tihsual te kha siamṭhat kan tum ang a, hnehna chan let kan duh a ni," a ti a, tlawm nawn a tum lo.

Liverpool tan tlarhmaah Roberto Firmino, Mohamed Salah leh Sadio Mane te an pawimawh leh dawn tihna a ni a, Stamford Bridge-ah goal khung ngei an tum ang - Liverpool hian hnehna an chan chuan Premier League match hmasa pasariha chak vek thei awmchhun an ni ang.

Reds innghahna VVD
Liverpool-in tun hnai transfer-a an lei fuh ber pawl chu Virgil van Dijk a ni. Dutch defender hona hnuaiah Liverpool tlarhnung an khawng a, Joe Gomez emaw Dejan Lovren pawh khel se VVD bulah chuan an khel ṭha sawt zel.

Mahse, Liverpool fans tan thu hriat nuam lo a awm - chu chu Virgil van Dijk a inlan thei lo mai thei tih hi a ni. Kum 27 mi defender tel loin Chelsea lakah Reds tlarhnung a nghing tawh a, Klopp tan chuan manganna tham a ni.

German coach chuan, "Van Dijk hian team training pawh a la zawm lo a, kan nghah phawt a ngai a ni. VVD hi world class player a ni a, world class player a inhliam a nih chuan team tan a ṭha lo a ni.

"Mahse, Van Dijk hi kan chhawr thei lo a nih pawhin duhthlan tur kan nei a, lungngaihna tur kan nei lo," a ti a, a player-te a ring tawk.

Sarri leh Chelsea
Maurizio Sarri-a'n league match ruk chauh Blues a la enkawl rih a ni mai thei a, mahse Italian manager hi fans lawm hlawh ber pawl a ni der tawh a, Chelsea khelh dan zawng zawng nen kil tin aṭanga fak a ni der tawh.

Klopp chuan an khingpui tur manager hi fakin, "Infiamna huang chhungah chuan hun tlemte chhunga khelh dan thlak rang ber an ni hial ang. Engkim hi a inthlak danglam nghal hlawk a, Sarri hi manager ropui tak a ni," a ti.

Italian journalist Stefano Boldrini chuan Conte leh Sarri khaikhinin, "Conte kha ni khata darkar 24 a nih chuan Sarri chu darkar 48 a ni thung. Chelsea-a zawm tirh lamah kha chuan nitin darkar 10 emaw 14 chu technical ground, computer leh TV-ah hun a hmang ṭhin. A tan chuan English league hi chona phurawm tak a nih vang a ni a, team khelh dan a en reng ṭhin a ni," tiin a sawi.

Sarri hnuaia hmasawn nasa ber chu Eden Hazard a ni. Kum 27 mi forward hian Liverpool nen an intawn hmasakah goal ropui a khung tawh a, tun season-ah match sarih khelin goal ruk a khung tawh - Reds tan ven uluk a ṭul ang.