Champion lai Chhinga Veng an danglam

Mc Dowell's No. 1 Soda Mizoram Premier League Season 7-ah champion lai Chhinga Vengin nimin tlai khan Mizoram Police 2-0 in an hneh a, goal hnih khungtu MS Dawngliana chu man of the match a ni.

Chhinga Veng hian October 4, Ningani zanah anmahni ang bawka match ngaa point 13 hmu Electric Veng an hmachhawn dawn a, hmahruaitu nih inchuhna inkhel hi tualchhung football ngainatute tan chuan hmaih phal phal chi a ni lo ang.

Rang leh che muang

Chhinga Vengin game nung tak leh rang ṭha tak an khel a, Mizoram Police player-ten dan an harsat. Chhingcows hian Dawngtea, Lalromawia leh F. Lalnuntluanga te hmangin mawi zetin Police tlarhnung an ṭhiat a, amaherawhchu Bawngkawn tlangval goal khung tura insiamrem chu Police defender Lalbiaknunga'n a tibuai hman.

Police-in first half tawp lamah goal chance rawn nei mah se inkhelah erawh Chhingcows-in ball an chang tam zawk a, chutihrualin Lalsangzuala Hmar hote hian goal khung ngeina tur chance erawh an insiam thei lo. Second half hun tam zawkah pawh inkhel kalhmang a danglam chuang lo a, Police-in tharum hmangin a kaw tawpah an ṭang.

Champion lai nge nge

Chhinga Veng winger Tluanga khalh lut tur Lalṭanpuia'n box pawn chiah titlu mah se Police keeper hi a a vannei a, yellow card chiah pek a ni. Minute 84-naah erawh Police an ṭang khawng thei ta bik lo a, Chhingcows substitute Lalsawmzela vawrhluh chu Dawngtea'n keeper pet khum nan hmangin Police defender-ten an clear hman tawh lo.

Police-in goal an chhuah hnuah an nawr let a, substitute Eric Lalsangzuala chu box chhungah Lalrinchhana hmaah a tlu a, penalty ni awm taka ngaih theih hi referee Lalbiakhlua Hrahsel chuan penalty a pe lo a, Police lungawi lo mah se replay erawhin referee thutlukna a ṭawmpui zawk.

Chhinga Veng keeper Zothanmawia chuan Police lungawi lohna chu remchangah a la nghal a, ball per chu rang taka lain a vawrhluh nghal a, Dawngtea'n inringtawkna nen box pawn aṭangin mawi zetin chak nemnghehna goal a khung. Police-in an lungawi lohna an lantir a, keeper ṬP-a chu hnawhchhuah a ni.

Lawm leh lawm lo

Mizoram Police coach Lalbiaksanga Colney chuan, "Point min ruk sak a ni. Penalty ngei tur a ni a, min pe se chuan result a dang ang. Chhinga Veng player-te an che rang a, ball chang tam mah se chance ṭha kan pe lo," tiin referee thutlukna vanga point hmu lo an nih thu a sawi.

Chhinga Veng coach Lalsangzuala Hmar chuan, "First half-ah game plan A a thawk lo a, second half-ah game plan B kan hmang leh a. Min chak puitu tak erawh vanneihna leh team thawhhona ṭhat vang a ni a. Aizawl FC nen kan inhnehtawk hnua point thum kan hmu hi kan lawm takzet a ni," tiin Vanglaini a hrilh.

Mizoram Police 0 - 2 Chhinga Veng
CVFC : MS Dawngliana 84', 90+4'
MoM : MS Dawngliana, CVFC