United buaina belhchhah zel

Manchester United chuan kartawpa Wolverhampton nen an inhnehtawk hnuah League Cup-ah Championship club Derby County hneh loin an tla a, an buaina hi hetah hian a tawp lo. Ningani zinga Carrington-a training-na hmunah Jose Mourinho leh Paul Pogba te chu thinrimin an inchhang niin a lang a, hemi hma hian Portuguese manager hian French midfielder hi a captain tawh loh tur thu a sawi tawh bawk.

United hian zanin dar 5:00 hian London Stadium-ah West Ham United an tlawh dawn a, Marcus Rahsford chu Burnley nen an inkhelh ṭuma red card a hmuh hnuah chhawr theih a ni dawn a, chutihrualin an inkhel tur aiin Pogba nge chhuak hmasa dawn Mourinho tih zawhna chuan ngaihven a hlawh zawk.

Spanish football expert Guillem Balague chuan, "Mourinho hian a thil tih hi a hria a, camera a awm tih pawh a hria. Engtik lai pawha inral ring reng a ni a, a player-te cho phur chi a ni. Amaherawhchu tunah chuan a player-te chhan let dan a dang a, a thuhnuaiah a dah thei tawh lo ni te pawhin a lang. Mahse Pogba hian match sarihah goal li khungin assists vawi hnih a nei a, hei hi a ṭha tawk em, Mourinho thlir dan hi a dik em tih chu hunin a hril ang," tiin Real Madrid manager hlui Mourinho chungchang a sawi.

Balague hian Pogba agent Mino Raiola chu Zlatan Ibrahimovic chungchanga Barcelona nen ṭawngkam fei kir bar an hman nasat avangin Catalan club tana French midfielder khelh chu thil awlsam a nih loh tur thu a sawi a, Raiolo sum phut a tam dawn bawk avangin sawi ang ngawta awlsam a nih loh thu a sawi lang bawk.

Hetihlai hian Mourinho pawh tuna a buaina vang hian PSG tan chuan tun hmaa a itawm ang a nih loh thu a sawi tel a, Portuguese manager pawh hi an ban a nih chuan club lian enkawl tur a van ang.