Juventus mualah Napoli Ronaldo leh Ancelotti intawng dawn

Zanin dar 9:30 hian Juventus khelmualah Napoli an lenglut dawn a, Italian champion nih tuma inum lai team pahnih inkhel hi a boruak a dai lo ang. Club ṭha pahnih an nih avangin a hmuhnawm dawn a, a ngaihnawmna belhchhahna tur chu Carlo Ancellotti-a'n Real Madrid lama a enkawl tawh Cristiano Ronaldo a hmachhawn tur hi a ni.

Spanish club tana an thawhdun laiin Ronaldo hian, "Carlo hi pa ṭha tak a ni a, keimah chauh ni loin player dangte pawh nitin a be ziah, inpawhna ṭha tak kan nei a, thawhpui a nuam takzet. Coach ka hriat tawh zinga ṭha leh ropui berte zinga mi a ni a, player zawng zawng hian ani nena thawhdunna hun nei thei se ka duhsak," tih hialin Italian manager a dahsan thu a lo sawi tawh, zaninah pawh zahna nen a hmachhawn ang.

Chelsea, Bayern Munich, AC Milan leh Real Madrid enkawl tawh­tu hian tun season aṭangin Napoli a enkawl a, 1990 hnua league nomawi la chawi lo club hi hlawhtlinpui a tum dawn. A kawng erawh a awlsam dawn lo, champion lai Juventus hian Ronaldo an neih belh ve miau a ni.

A ṭha pahnih

Season sarih chhung Serie A nomawi chawi thei Juventus tan an elpui club huphurh tur an awm lo a, chutihrualin Napoli hi awlsam taka nuai liam mai theih tur an ni bik lo - season hmasa pawh khan match hnih khelh tur chauh a awm tawh tihah pawh champion tur a chiang bik lo.

Kuminah pawh thil a danglam tam lo, Turin club hian match ruk chhung hnehna an chang tawh a - an record hi 100% chak a ni. Pahnihna nilai Napoli pawh an duai bik lo, vawi khat chiah chak loh an nei; Juve an hneh thei a nih chuan an point a inzat dawn tihna a ni.

Lazio, Roma, Inter Milan leh AC Milan te hi club lian leh ṭha chu ni ve tho mah se, tuna an boruak tawn chhoh mek thlir chuan Juve leh Napoli hi inel leh ber tur an ni a, hei vang hian zanina an inkhel tur hi a pawimawh dawn.

A goal dawn

Allianz Stadium hi mikhual tana inkhelh harsatna hmun a nihzia inhrilh nawn a ngai lo ang, chutih rualin Napoli hian an lenluh hnuhnung vawi thumah goal an khung thei vek - season kal laia league goal 12 khung tawh hian Turin khaw club tlarhnung sut hawn hi an huphurh hran lo ang tih a rin theih.

Ronaldo leh goal sawi hran theih a ni lo a, Portuguese for­ward hian a kalna lam apiangah goal a khung zel; Juve tan pawh goal thum a khung leh tawh. Ani bakah hian Paulo Dy­bala-a'n an match hnuhnung berah tun season chhunga a goal hmasa ber a khung leh tawh - Argentine forward leh Ronaldo hi an inkawp fuh chho a nih chuan goal tam zawk an khung ngei ang.

Juve lamin hliam vangin Sami Khedira an chhawr thei dawn lo a, hliam a tawrh bakah hrem ni bawk Douglas Costa pawh a hmel a inlan thei lo ang. Napoli lamin defender Vlad Chiriches an chhawr thei dawn bik lo, player dang erawh inelna hautak hmachhawn turin an inpeih.