Madrid derby - Real vs Atletico Tu nge ropui zawk dawn?

Madrid khawpuia club ropui zawk nih inchuhin Atletico Madrid leh Real Madrid chu zanin hian an intawng leh dawn ta - dar 12:15-ah Santiago Berna­beu-ah an inkhel ang.

Atletico Madrid-in beisei angin season bul ṭan lo mah se Real Madrid-in an match hnuhnung berah 3-0 ngawta Sevilla an ngam loh avangin an ṭhenawm club hi an hnaih leh viau tawh - an inthlauhna hi point hnih chiah a ni.

Diego Simeone-a naute hian hnehna an chang a nih chuan Real Madrid an lehpel thei dawn tihna a ni a, an hun ṭha neih hi bawhpelh an duh lo ang.

Ngam tawh hnu!

Real coach Julen Lopetegui tan tun hi La Liga-a a Madrid derby hmasa ber tur a ni a, Diego Simeone erawhin a tawn fo tawh a ni thung. Derby hrim hrim­ah chuan season ṭantirah khan team pahnih hi an intawng tawh.

UEFA Super Cup-ah club inhal pahnih hi an inkhel a, Atletico-in 4-2 a hnehna chang­in an khaw club an chhuk en - Real ṭantu ten hei hi na an ti a, zaninah mahni mual ngeia hneh let an duh ang.

Super Cup-a Real an tlawm ṭumin Cristiano Ronaldo leh Zinedine Zidane ngaiin fan-ten an player leh manager ropui pahnih hming an lam sup sup a, Lopetegui tan a tihreh dan awlsam ber chu hnehna chan a ni.

Kawng inang lo...

Atletico-in season bul ṭan­naah Real an hneh nghal avang­in an phur a, an beisei ang erawhin season an ṭan lo - La Liga-ah Valencia an inhnehtawkpui zui a, Rayo Vallecano hneh mah se Celta Vigo lakah an tlawm zui a, Eibar an inhnehtawkpui bawk.

Mahse, Atletico an tlu rei lo. Champions League-a Mo­naco an hneh hnuah Getafe leh Huesca an hneh a, an phur vanglai taka Real an hma­chhawn tur hi an lawm zawk hial ang - Real thawnthu erawh a dang thung.

Atletico an ngam loh hnuah an insiamṭha a, Champions League-a Roma an sawp bakah league match nga zet chu tlawm loin an kaltluang hman. Mahse, Sevilla mualah rin loh takin an tlawm a, insiamṭhat nana Atletico hman tum chu hna hautak tak a ni ngei ang.

Buaina belhchhahna!

Real-in result duhawm lo an nei a, an buaina belhchhah turin player inhliam an nei nual. Sevilla an hneh loh ṭum hian hliam vangin Marcelo lakchhuah a ngai a, Brazilian defender hian Atletico a hma­chhawn thei lo ang.

Isco chu a rilphir zai a nih avangin thla khat tal a chawlh a ngai dawn a, Madrid derby a khel thei dawn lo. Tlarhma lamah Marco Asensio, Karim Benzema leh Gareth Bale te an pawimawh lehzual dawn tihna a ni.

Hetihlai hian hliam vanga match hnih ngawt khel tawh lo Dani Carvajal chuan club training a zawm leh tawh a, mahse derby boruak sang meuha bul ṭan nghal chu Spanish right back tan a harsa mai thei.

Atletico an phur

Simeone-a team tan an match hnuhnung berah Juan­fran inlan thei lo mah se Madrid derby-ah chuan a lo kir tawh beisei a ni a, Lucas Hernandez-a'n left back-ah Filipe Luis thlak theih a inbeisei bawk ang.

José Giménez chu Huesca lakah lakchhuah ni mah se training a zawm leh tawh bawk. Atletico-in tlarhmaah Antoine Griezmann leh Diego Costa an nei a, anni thlawp turin Koke leh Saul Niguez an awm bawk avangin Real tlarhnung tan hna a harsa dawn.

Diego Simeone chuan, "Re­sult ṭha tak nei chungin derby kan khel dawn a, kan result neih ṭhat hian phur taka khel turin Real lakah min puih ka beisei a ni," tiin a sawi.

Courtois tan a danglam

Julen Lopetegui-a'n a goal­keeper pahnih Thibaut Courtois leh Keylor Navas a nei a, tun thleng chuan goalkeeper pahnih hi a thlak kual ṭhin - zaninah Courtois a khel a nih chuan Belgian keeper tan inkhel danglam bik a ni ang.

Kum 26 mi goalkeeper hian Chelsea-a a awm laiin Atletico tan season thum chhung loan-in a lo khel tawh a, khawvela goalkeeper ṭha ber pawlah invawrh chhoin Madrid derby hi vawi kua a khel hman.

Courtois-a'n Madrid derby-a khelhah vawi ruk an tlawm a, vawi hnih chakin vawi khat an inhnehtawk - Atletico chak nana si ban nghak ṭhin khan Real chakpui tumin a khel dawn ta.